పదో తరగతి విద్యార్థులకు కీలక సూచన

తెలంగాణ రాష్ట్రంలో 2025 మార్చిలో జరుగనున్న పదవ తరగతి వార్షిక పరీక్ష ఫీజుల చెల్లింపు తేదీలు ఖరారయ్యాయి. ఈ మేరకు ప్రభుత్వ పరీక్ష విభాగం ఒక ప్రకటన విడుదల చేసింది. 10వ తరగతి విద్యార్థులకు వార్షిక పరీక్ష ఫీజు చెల్లింపునకు సంబంధించి తెలంగాణ పరీక్షల డైరెక్టర్ షెడ్యూల్‌ను విడుదల చేశారు. షెడ్యూల్ ప్రకారం, పరీక్ష ఫీజు చెల్లించడానికి చివరి తేదీ నవంబర్ 18గా నిర్ణయించారు. అదనపు ఫీజులను నివారించడానికి విద్యార్థులు ఈ తేదీలోపు తమ ఫీజులనుచెల్లించాలని సూచించారు.

పేర్కొన్న తేదీ తర్వాత చెల్లించాలనుకునే విద్యార్థుల కోసం ఆలస్య రుసుము విధానం అమలు చేయనున్నారు. 50 రూపాయల ఆలస్య రుసుముతో పరీక్ష ఫీజును చెల్లించడానికి చివరి తేదీ డిసెంబర్ 2. ఆలస్య రుసుము 200తో పరీక్ష ఫీజును చెల్లించడానికి చివరి తేదీ డిసెంబర్ 12, ఇక 500 రూపాయల ఆలస్య రుసుముతో పరీక్ష ఫీజు చెల్లించడానికి చివరి గడువు డిసెంబర్ 21 గా నిర్ణయించారు అధికారులు.

రెగ్యులర్ విద్యార్థులకు అన్ని సబ్జెక్టులకు 125 వసూలు చేయనున్నారు. మూడు లేదా అంతకంటే తక్కువ సబ్జెక్టులకు హాజరయ్యే విద్యార్థులకు ఫీజు 110 కాగా మూడు కంటే ఎక్కువ సబ్జెక్టుల్లో ఫెయిల్ అయిన విద్యార్థులు 125 చెల్లించాల్సి ఉంటుంది. ఫీజు చెల్లింపు ప్రక్రియ సజావుగా జరిగేలా, విద్యార్థులు తమ ప్రిపరేషన్‌లను పూర్తి చేయడానికి తగిన సమయాన్ని అనుమతించేలా విద్యార్థులకు వెంటనే తెలియజేయాలని పరీక్షల డైరెక్టర్ అన్ని పాఠశాలల నిర్వాహకులను అభ్యర్థించారు.