Video : మహిళను దారుణంగా కొడుతున్నా చూస్తూ ఉండిపోయారు.. వీడియోలు తీశారు
మధ్యప్రదేశ్‌లోని ధార్ జిల్లాలో పట్టపగలు కొందరు వ్యక్తులు ఒక మహిళను దారుణంగా కొట్టారు.
By Medi Samrat
మధ్యప్రదేశ్‌లోని ధార్ జిల్లాలో పట్టపగలు కొందరు వ్యక్తులు ఒక మహిళను దారుణంగా కొట్టారు. చుట్టుపక్కలవారు ఆ మహిళకు సహాయం చేయకుండా సినిమాను చూస్తునట్లు చూస్తూ ఉండిపోయారు. ఒక పురుషుల గుంపు మహిళను నిర్దాక్షిణ్యంగా కొట్టారు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారడంతో నెటిజన్లు ఆగ్రహం వ్యక్తం చేస్తున్నారు. అధికారులు స్పందించి విచారణ చేపట్టారు.
“గుర్తు తెలియని వ్యక్తులు ఓ మహిళను కొట్టిన వీడియో సోషల్ మీడియాలో వైరల్ అవుతోంది. ఈ వీడియోపై పోలీసులు దర్యాప్తు ప్రారంభించారు. సంఘటన జరిగిన ప్రాంతాన్ని మేము కనుగొన్నాము. విచారణ చేస్తున్నాం” అని ధార్ సూపరింటెండెంట్ ఆఫ్ పోలీస్ మనోజ్ కుమార్ సింగ్‌ మీడియాకు తెలిపారు. ఈ కేసులో ప్రధాన నిందితుడిని గుర్తించి అదుపులోకి తీసుకున్నారు. మిగతా నిందితుల ఆచూకీ కోసం గాలిస్తున్నామని, త్వరలోనే అరెస్ట్ చేస్తామని పోలీసులు చెప్పారు. అయితే ఈ వీడియోలో ఆమె దెబ్బలు తింటూ కేకలు వేస్తున్నప్పటికీ ఆమెను కాపాడడానికి అక్కడ ఉన్న వాళ్లు కనీసం ముందుకు రాకపోవడం దారుణం.
