Asifabad: యువకుడిని కొట్టి చంపిన కుటుంబ సభ్యులు.. ఆపై డెడ్‌బాడీని బావిలో పడేశారు

కుమ్రంభీం జిల్లా దహేగం మండలంలోని ఓ పాడుబడిన బావిలో యువకుడి మృతదేహం లభ్యమైంది. మృతుడిని మానకొండూరు మండలానికి చెందిన 29 ఏళ్ల అనంతోజు సాయికిరణ్‌గా గుర్తించారు. ఈ ఘటనకు సంబంధించిన పూర్తి వివరాలు ఇలా ఉన్నాయి. బాధితుడు ఏప్రిల్ 18న సిద్దిపేటకు వెళ్లేందుకు ఇంటి నుంచి బయలుదేరాడు. అతను తిరిగి రాకపోవడంతో మే 2న కుటుంబ సభ్యులు సాయి కిరణ్‌ కనిపించడం లేదని పోలీసులకు ఫిర్యాదు చేశారు.

బాధితుడు గతంలో సిద్దిపేట కొండాపూర్‌లోని ఓ పౌల్ట్రీ ఫామ్‌లో పనిచేసినట్లు విచారణలో పోలీసులు గుర్తించారు. అక్కడ కుమురంభీం ఆసిఫాబాద్‌లోని బెజ్జూరుకు చెందిన బట్టి శ్రీనివాస్‌, ఆయన భార్య సునీతలు కూడా పని చేసేవారు. వారితో సాయికిరణ్‌ సన్నిహితంగా ఉండేవాడని పోలీసుల విచారణలో తేలింది. ఈ మేరకు బట్టి శ్రీనివాస్‌ను పోలీసులు అదుపులోకి తీసుకున్నారు. ఆ తర్వాత సాయికిరణ్ ఏప్రిల్ 19న దహేగావ్‌లోని సునీత తల్లి ఇంటికి వచ్చినట్లు తెలిసింది.

తదుపరి సంఘటనల క్రమం అస్పష్టంగానే ఉంది. తొలుత నిందితుడిగా భావించిన శ్రీనివాస్‌ సాయికిరణ్‌ మృతిలో తన ప్రమేయాన్ని అంగీకరించినట్లు పోలీసులు తెలిపారు. నిందితుడు శ్రీనివాస్, అతని భార్య సునీత, ఇతర కుటుంబ సభ్యులు సాయికిరణ్ తలపై బండరాళ్లతో కొట్టి చంపారు. ఆ తర్వాత పాడుబడిన బావిలో పడేశారు. పోలీసులు కేసు నమోదు చేసుకొని తదుపరి విచారణ జరుపుతున్నారు. పూర్తి విచారణ అనంతరం వివరాలు వెల్లడిస్తామని పోలీసులు పేర్కొన్నారు.