రేవ్ పార్టీలో మాజీ మంత్రి అల్లుడు సహా ఆరుగురు అరెస్ట్

రేవ్ పార్టీలో మాజీ మంత్రి అల్లుడు అరెస్టు కావడం ఆ రాష్ట్రంలో హాట్ టాపిక్‌గా మారింది. మహారాష్ట్రలోని పూణె ఖరాడి ప్రాంతంలో శనివారం రాత్రి ఆ రాష్ట్ర పోలీసులు ఒక హై ప్రొఫైల్ రేవ్ పార్టీపై దాడి చేసి ఇద్దరు మహిళలు సహా ఏడుగురిని అరెస్టు చేశారు. ఈ క్రమంలో అక్కడ నుంచి డ్రగ్స్, లిక్కర్, నిషేధిత వస్తువులను స్వాధీనం చేసుకున్నారు.

అరెస్టయిన వారిలో ఎన్‌సిపి (శరద్ పవార్ వర్గం) మహిళా విభాగం రాష్ట్ర అధ్యక్షురాలు, మహారాష్ట్ర మాజీ మంత్రి ఏక్‌నాథ్ ఖడ్సే అల్లుడు రోహిణి ఖడ్సే భర్త ప్రాంజల్ ఖేవాల్కర్ కూడా ఉన్నారు. పార్టీలో ఒక మహిళా ఎమ్మెల్యే భర్త ఉన్నట్లు కూడా అధికార వర్గాలు వెల్లడించాయి. అదనంగా, పేరుమోసిన బుకీ నిఖిల్ పోపటానీకి పార్టీతో సంబంధాలు ఉన్నాయని భావిస్తున్నారు. స్వాధీనం చేసుకున్న పదార్థాలలో కొకైన్, MD డ్రగ్స్, వీడ్, ప్రీమియం లిక్కర్, హుక్కాలు ఉన్నాయి.

చట్టవిరుద్ధ కార్యకలాపాలు జరుగుతున్నాయనే పక్కా సమాచారం మేరకు పూణే క్రైమ్ బ్రాంచ్ నేతృత్వంలో రాడిసన్ హోటల్ వెనుక ఉన్న "స్టే బర్డ్" అనే విలాసవంతమైన అతిథి గృహంలో ఈ దాడి జరిగింది. Airbnb ద్వారా బుక్ చేసుకున్న ఒక ప్రైవేట్ ఫ్లాట్‌లో జరిగిన ఈ పార్టీలో డ్రగ్స్, మద్యం సేవించడంతో పాటు, వేదిక వద్ద బిగ్గరగా సంగీతం వినిపించింది. మాదకద్రవ్యాల నమూనాలను పరీక్షిస్తామని, నార్కోటిక్ డ్రగ్స్, సైకోట్రోపిక్ సబ్‌స్టాన్సెస్ (NDPS) చట్టం కింద తదుపరి చర్యలు తీసుకుంటామని పోలీసులు నిర్ధారించారు.