తప్పుడు 'పోక్సో' కేసు పెడతామంటూ.. లక్షలు వసూలు చేసిన మహిళా పోలీస్ ఇన్‌ఫ్లూయెన్సర్..!

మహారాష్ట్రలోని పుణెలో ముగ్గురు పోలీసులు కలిసి లక్షలు వసూలు చేశారు. ఇన్స్టాగ్రామ్‌లో భారీ ఫాలోయింగ్ ఉన్న 'దామిని స్క్వాడ్' మహిళా పోలీస్ సోనాలి హింగేతో పాటు, సబ్-ఇన్‌స్పెక్టర్ అజిత్ బడే, కానిస్టేబుల్ సుదామ్ తాయడేలపై కేసు నమోదైంది. ఒక ప్రముఖ పాఠశాలకు చెందిన 55 ఏళ్ల ప్రిన్సిపాల్‌పై తప్పుడు పోక్సో (POCSO - లైంగిక నేరాల నుంచి పిల్లల రక్షణ చట్టం) కేసు నమోదు చేస్తామని బెదిరించి, ఆయన వద్ద ఏకంగా రూ. 7 లక్షలు వసూలు చేసినట్లు వీరు ఆరోపణలు ఎదుర్కొంటున్నారు.

"గుడ్ టచ్, బ్యాడ్ టచ్" గురించి విద్యార్థులకు అవగాహన కల్పించే సాకుతో ఈ ముగ్గురు పోలీసులు ఆ స్కూల్‌కు వెళ్లారు. అక్కడే ఈ ప్రిన్సిపాల్‌ను టార్గెట్ చేసి, ఆయనపై పోక్సో కేసు పెడతామని, పరువు తీస్తామని భయభ్రాంతులకు గురిచేశారు. విషయాన్ని 'సెటిల్' చేస్తామంటూ డబ్బు డిమాండ్ చేశారు. పరువు పోతుందోనని, చట్టపరమైన చిక్కులు వస్తాయని భయపడిన ఆ ప్రిన్సిపాల్ వారికి రూ. 7 లక్షలు చెల్లించారు. ఆ తర్వాత అనుమానం వచ్చి సీనియర్ పోలీసు అధికారులకు ఆయన ఫిర్యాదు చేశారు. బాధితుడి ఫిర్యాదు మేరకు స్పందించిన పుణె పోలీస్ కమిషనర్ అమితేష్ కుమార్.. ఈ వ్యవహారంపై విచారణకు ఆదేశించారు. ప్రాథమిక విచారణ అనంతరం సదరు ముగ్గురు పోలీసులపై క్రిమినల్ కేసు నమోదు చేశారు.