మహిళ పట్ల అనుచిత ప్రవర్తన.. మియాపూర్ పోలీసు సస్పెండ్

హైదరాబాద్: తమను నమ్ముకుని, సహాయం చేస్తారని వచ్చిన బాధితులకు అండగా ఉండాల్సిన ఓ పోలీసు అసభ్యకర చేష్టలకు పాల్పడ్డాడు. మహిళా ఫిర్యాదుదారు పట్ల అనుచితంగా ప్రవర్తించినందుకు మియాపూర్ పోలీస్ స్టేషన్ సర్కిల్‌ ఇన్‌స్పెక్టర్ ఎం ప్రేమ్ కుమార్‌ను సైబరాబాద్ పోలీస్ కమిషనర్ అవినాష్ మొహంతి ఫిబ్రవరి 6 మంగళవారం సస్పెండ్ చేశారు. ఇటీవల ఓ మహిళా బాధితురాలు తన భర్త నుండి ఎదుర్కొంటున్న వేధింపులకు వ్యతిరేకంగా సహాయం కోరుతూ పోలీస్ స్టేషన్‌ను ఆశ్రయించింది. అయితే ఆమె సర్కిల్‌ ఇన్‌స్పెక్టర్ ప్రేమ్ కుమార్ నుండి అనుచిత ప్రవర్తనను ఎదుర్కొంది.

మహిళ పట్ల ప్రేమ్‌ కుమార్‌ అసభ్యకరంగా ప్రవర్తించాడు. దీంతో విసిగిపోయిన సదరు మహిళ సైదరాబాద్‌ పోలీసు ఉన్నత అధికారులకు ఫిర్యాదు చేసింది. ఉన్నతాధికారుల విచారణలో ప్రేమ్‌ కుమార్‌ బాగోతం బయటపడింది. డిసెంబరు 2023లో జరిగిన ఒక ప్రత్యేక సంఘటనలో, మియాపూర్ పోలీస్ స్టేషన్‌కు చెందిన సబ్-ఇన్‌స్పెక్టర్ గిరీష్ కుమార్ కూడా ఒక మహిళా ఫిర్యాదుదారుడితో ఆమె నివాసంలో జరిగిన విచారణలో అసభ్యంగా ప్రవర్తించారనే ఆరోపణలపై సస్పెండ్ చేయబడ్డారు.