పెళ్లి పేరుతో లేడీ డాక్టర్‌కు రూ.10 లక్షల టోకరా..మోసపోయానని చివరికి ఏం చేసిందంటే?

హైదరాబాద్‌లో ఓ లేడీ డాక్టర్‌కు రూ.10 లక్షల మేర టోకరా పెట్టిన ఘటన వెలుగు చూసింది.హైదరాబాద్‌లో ఓ లేడీ డాక్టర్‌కు రూ.10 లక్షల మేర టోకరా పెట్టిన ఘటన వెలుగు చూసింది. వివరాల్లోకి వెళ్తే.. జూబ్లీహిల్స్ పోలీస్ స్టేషన్ పరిధిలో నివాసముంటున్న యువతి గచ్చిబౌలిలోని ఓ హాస్పిటల్‌లో వైద్యురాలిగా పని చేస్తున్నారు. ఇటీవల పెళ్లి సంబంధాల కోసం షాదీ డాట్ కామ్‌లో ప్రకటన ఇవ్వగా నిర్వాహకులు హర్ష చెరుకూరి అనే యువకుడికి చెందిన వివరాలను నిర్వాహకులు అందజేశారు. యువతి నెంబర్‌ను హర్షకు ఇచ్చారు. దీంతో గత నెల 30 నుంచి వారిద్దరూ వాట్సాప్‌ చాటింగ్‌ ద్వారా మాట్లాడుకుంటున్నారు. తన తల్లి డా.లక్ష్మీ హరిత చికాగోలోని నార్త్‌ వెస్టర్న్‌ ఆస్పత్రిలో వైద్యురాలిగా పని చేస్తుంటుందని హర్ష నమ్మించాడు. తమకు పెద్ద ఎత్తున వ్యాపారాలు ఉన్నాయని, ఇటీవల ఐటీ శాఖ దాడులతో బ్యాంక్‌ అకౌంట్స్‌ సీజ్‌ అయ్యాయని చెప్పాడు. త్వరలోనే తల్లి ఇండియాకు వచ్చి పెళ్లి గురించి ఫైనల్‌ చేస్తుందని చెప్పిన హర్ష మాటలు పూర్తిగా నమ్మిన యువతి అతడితో మరింత సన్నిహితంగా మాట్లాడడం ప్రారంభించింది.

ఈ క్రమంలో తనకు చెందిన కొన్ని ఫోటోలు అతడికి పంపించింది. కాగా ఇటీవల యువతికి ఫోన్‌ చేసిన హర్ష తనకు అర్జెంట్‌గా కొంత డబ్బు కావాలని, తమ అకౌంట్స్‌ సీజ్‌ కావడంతో పాటు పాన్‌ కార్డును ఐటీ అధికారులు తీసుకువెళ్లారని నమ్మించాడు. దీంతో అతడు సూచించిన నెంబర్లకు పలు దఫాలుగా రూ.10.94లక్షలను యువతి పంపించింది. త్వరలోనే డబ్బులు పంపిస్తానని, ఫిబ్రవరి 21న తల్లి అమెరికా నుంచి వచ్చాక నిశ్చితార్థం ఉంటుందని హర్ష చెప్పాడు. కాగా ఈ నెల 21న తల్లి వస్తుందని చెప్పిన హర్ష ముఖం చాటేయడంతో అనుమానం వచ్చిన యువతి తాను ఇచ్చిన డబ్బులు తిరిగి ఇవ్వాలని కోరింది. దీంతో తీవ్ర పదజాలంతో దూషించిన హర్ష అంతుచూస్తానంటూ బెదిరింపులకు దిగాడు. ఈ మేరకు బాధితురాలు జూబ్లీహిల్స్‌ పోలీసులకు ఫిర్యాదు చేయగా హర్ష చెరుకూరి అనే వ్యక్తిపై బీఎన్‌ఎస్‌ 79, 351(2), 319(2), 318(4)తో పాటు ఐటీ యాక్ట్‌ కింద కేసు నమోదు చేసి దర్యాప్తు చేపట్టారు.