పూజ గదిలో దాచాలని ఎట్టా అనిపించిందయ్యా.?

పూజగదిలో ఏకంగా గంజాయిని దాచాడో వ్యక్తి. శనివారం నాడు ధూల్‌పేటలోని ఓ వ్యక్తి ఇంట్లోని పూజ గదిలో వార్తాపత్రికల్లో చుట్టి గంజాయిని దాచిపెట్టాడనే ఆరోపణలపై ప్రొహిబిషన్ అండ్ ఎక్సైజ్ శాఖ అధికారులు ఒక వ్యక్తిని అరెస్టు చేశారు. తనకు తెలిసిన వ్యక్తులకు విక్రయించడానికి అతను ఒడిశా నుండి గంజాయిని తీసుకువచ్చాడు.

ఇద్దరు వ్యక్తులు ఒడిశా నుండి గంజాయిని అక్రమంగా రవాణా చేసి రెండు వేర్వేరు ప్రదేశాలలో విక్రయించారనే సమాచారం మేరకు, ఎక్సైజ్ స్టేట్ టాస్క్ ఫోర్స్ (STF) సూపరింటెండెంట్ ఎన్ అంజి రెడ్డి నేతృత్వంలోని ఎక్సైజ్ బృందం ధూల్‌పేటలోని ఇందిరానగర్‌లోని రోహన్ సింగ్ అనే వ్యక్తి ఇంటిపై దాడి చేసింది.

ఇంటి మొత్తం వెతికినా నిషిద్ధ వస్తువులు దొరకలేదు. ఆ తర్వాత పూజ గదిని క్షుణ్ణంగా తనిఖీ చేయగా దేవుళ్ల చిత్రపటాల వెనుక గంజాయి కనిపించింది. గంజాయిని వార్తాపత్రికల్లో చుట్టి, చిత్రపటాల వెనుక దాచిపెట్టారు. పూజ గదిలో గంజాయిని దాచిన తర్వాత రోహన్ సింగ్ కూడా పూజ చేశాడని, స్వాధీనం చేసుకున్న గంజాయి మొత్తం బరువు దాదాపు 10.9 కిలోలు ఉందని, రోహన్ సింగ్‌ను అరెస్టు చేశామని అధికారులు తెలిపారు.