సినిమాల్లో వేశాలు ఇప్పిస్తాన‌ని ల‌క్ష‌లు దండుకున్నాడు..!

తానొక దర్శకుడిని, నిర్మాతను అని చెప్పుకుంటూ పలువురు ఔత్సాహిక నటీనటులను మోసం చేసినందుకు ఓ వ్యక్తిని అరెస్ట్ చేశారు. ప్రశాంత్ తోమర్ అనే వ్యక్తి ఇచ్చిన ఫిర్యాదు ఆధారంగా ఢిల్లీ పోలీసులు నిందితుడిని అరెస్టు చేశారు. అనూజ్ కుమార్ ఓజా అనే వ్యక్తి దర్శకుడిగా నటిస్తూ సీరియల్స్, సినిమాల్లో పాత్రలు ఇప్పిస్తానని చెప్పి మోసం చేశాడని ఆయన వెల్లడించారు.

నిందితుడి ఇన్‌స్టాగ్రామ్ హ్యాండిల్‌లో పెయిడ్ బ్రాండ్ షూట్‌లకు సంబంధించిన పోస్ట్ చూశానని ప్రశాంత్ తన ఫిర్యాదులో పేర్కొన్నాడు. అగ్రిమెంట్‌పై సంతకం చేసి అడ్వాన్స్‌గా రూ.75 వేలు ఇవ్వాలని నిందితులు అడిగారు. అనూజ్ మళ్లీ ప్రశాంత్‌కి ఫోన్ చేసి ప్రొఫైల్ అప్‌డేట్ చేయడానికి, ఇన్‌కమ్ ట్యాక్స్ కు సంబంధించి సమస్యలు ఉన్నాయని మరింత డబ్బు అడిగాడు. మొత్తంగా నిందితుడు బాధితుడి నుంచి రూ.4.43 లక్షలు తీసుకుని అదృశ్యమయ్యాడు.

విచారణలో ఇన్‌స్టాగ్రామ్‌ని ఉపయోగించి, నిందితుడు తన పలువురు యువతను సినిమాల్లో యాక్టింగ్ అంటూ ప్రేరేపించాడని పోలీసులకు తెలిసింది. సాంకేతిక నిఘా లీడ్ ప్రకారం, నిందితుడిని పట్టుకోడానికి ప్రయత్నించగా అతను తన స్థానాన్ని మారుస్తూనే ఉన్నాడు. ఫిబ్రవరి 6, 2023న, అనూజ్ తులసి ఎక్స్‌ప్రెస్‌లో ఎక్కి భోపాల్‌కు వెళ్తున్నాడని దర్యాప్తు బృందానికి సమాచారం వచ్చింది. నిందితుడిని పట్టుకునేందుకు వెంటనే ఓ బృందాన్ని పంపించారు. అతను దర్యాప్తులో సహకరించకపోవడంతో.. ఆ తర్వాత న్యాయపరమైన ప్రక్రియ ప్రకారం అరెస్టు చేశారు. అనూజ్‌ దర్శకుడిగా, నిర్మాతగా నటిస్తూ యువతకు సినిమాలు, వెబ్‌ సిరీస్‌లు, బ్రాండెడ్‌ షూట్‌లు తదితర వాటిలో నటించే అవకాశం కల్పిస్తానంటూ మోసం చేసేవాడని పోలీసులకు విచారణలో తెలిసింది.

నిర్మాణ సంస్థ ఉండేది :

అనుజ్ విరాజ్ స్టీల్ లిమిటెడ్ కంపెనీలో పని చేసేవాడు. అతనికి రాకేష్ సింగ్‌తో పరిచయం కలిగింది. అతని పరిచయాలను ఉపయోగించి 'AVYA' పేరుతో నిర్మాణ సంస్థను నమోదు చేసుకున్నాడు. మూడు వీడియో సాంగ్స్ ను చిత్రీకరించాడు.. వాటిని యూట్యూబ్‌లో విడుదల చేశాడు. ఇన్‌స్టాగ్రామ్‌లో కొన్ని ఈవెంట్‌లు, ప్రమోషనల్ షోలను కూడా నిర్వహించాడు. దీంతో కొందరు అతనిని సంప్రదించడం ప్రారంభించారు.. ఔత్సాహిక యువతను మోసం చేయడానికి ఒక ప్రణాళికను రూపొందించాడు. అంతకుముందు 2019 లో గోరఖ్‌పూర్ జైలులో మూడు నెలల జైలు శిక్షను కూడా అతడు అనుభవించాడు.