కారులో శవమై క‌నిపించిన‌ మెడికో విద్యార్థిని.. కాలేజీ యాజమాన్యం షాకింగ్ స్టేట్‌మెంట్..!

డెహ్రాడూన్‌లోని ఒక ప్రముఖ మెడికల్ కాలేజీలో చదువుతున్న 26 ఏళ్ల విద్యార్థిని మృతదేహం కారులో అనుమానాస్పద స్థితిలో లభ్యమవ్వడం స్థానికంగా కలకలం రేపింది. పటేల్ నగర్ ప్రాంతంలో నిలిపి ఉంచిన ఒక పాడుబడిన కారులో ఆమె స్పృహలేని స్థితిలో ఉండటాన్ని గమనించిన కుటుంబ సభ్యులు, కారు అద్దాలు పగలగొట్టి ఆమెను బయటకు తీశారు. వెంటనే ఆసుపత్రికి తరలించినప్పటికీ, ఆమె అప్పటికే మృతి చెందినట్లు వైద్యులు ధృవీకరించారు. మృతురాలు నగరంలో అద్దెకు ఉంటూ వైద్య విద్యను అభ్యసిస్తోంది.

ఈ ఘటనపై ఆమె కుటుంబ సభ్యులు తీవ్ర ఆరోపణలు చేస్తున్నారు. సదరు విద్యార్థిని ఆత్మహత్యకు అదే కాలేజీకి చెందిన ఒక డాక్టర్ వేధింపులే కారణమని, అతనే ఆమెను ఈ అఘాయిత్యానికి ప్రేరేపించాడని పోలీసులకు ఫిర్యాదు చేశారు. ప్రమాదం జరగడానికి ముందు రోజు రాత్రి ఆమె తన తండ్రితో ఫోన్‌లో మాట్లాడిందని, ఆ సమయంలో ఆమె తీవ్ర మనస్తాపానికి గురైనట్లు కనిపించిందని వారు తెలిపారు. ఆ ఫోన్ కాల్ తర్వాత ఆమె ఆచూకీ లభించకపోవడంతో తండ్రి స్వయంగా డెహ్రాడూన్ చేరుకుని వెతకగా, చివరకు కారులో విగతజీవిగా కనిపించింది. కుటుంబ సభ్యుల ఫిర్యాదు మేరకు పోలీసులు సదరు డాక్టర్‌పై కేసు నమోదు చేసి దర్యాప్తు ప్రారంభించారు.

మరోవైపు, మెడికల్ కాలేజీ యాజమాన్యం ఈ ఘటనపై భిన్నమైన ప్రకటన విడుదల చేసింది. సదరు విద్యార్థిని గత కొంతకాలంగా మానసిక ఆరోగ్య సమస్యలతో బాధపడుతోందని, ఆమెకు చికిత్స కూడా అందుతోందని పేర్కొంది. గత ఏడాది డిసెంబర్ 31న కూడా ఆమె ఆత్మహత్యాయత్నానికి పాల్పడిందని, ఆమె మానసిక స్థితి గురించి కుటుంబ సభ్యులు అప్పట్లోనే కాలేజీ విభాగానికి లిఖితపూర్వక సమాచారం ఇచ్చారని సంస్థ వెల్లడించింది. ప్రస్తుతం పోలీసులు పోస్టుమార్టం నివేదిక కోసం ఎదురుచూస్తున్నారు. ఇది ఆత్మహత్యా లేక మరేదైనా కారణమా అనే కోణంలో ఫోన్ కాల్ డేటా మరియు సీసీటీవీ దృశ్యాలను విశ్లేషిస్తున్నారు.