మహిళ గర్భాశయంలో గుడ్డ వదిలి కుట్లు వేసిన వైద్యులు.. తీవ్రమైన ఇన్ఫెక్షన్ అవ‌డంతో..

డెలివరీ ఆపరేషన్ సమయంలో వైద్యుల నిర్లక్ష్యంతో ఉత్త‌ర‌ప్ర‌దేశ్‌లోని బ‌రేలిలో ఓ మహిళ ప్రాణాలకు ముప్పు వాటిల్లింది. వైద్యులు మహిళ గర్భాశయంలో గుడ్డ వదిలి కుట్లు వేశారు. ఫిర్యాదు శనివారం డీఎం అవినాష్‌సింగ్‌కు చేరడంతో ఆయన ఆస్పత్రికి సీల్‌ వేశారు. ఆసుపత్రి ఆపరేటర్ షాబాజ్, వైద్యులపై ఎఫ్ఐఆర్ నమోదు చేయబడింది. వైద్య ఆరోగ్య శాఖ కూడా విచారణ కోసం బృందాన్ని ఏర్పాటు చేసింది.

జూన్ 3న గర్భవతి అయిన తన భార్య నూర్జహాన్‌ను ఏవాన్ ఆసుపత్రిలో చేర్చినట్లు తాహిర్ ఖాన్ తెలిపారు. వైద్యులు ఆమెకు శస్త్రచికిత్స ద్వారా ప్రసవం చేశారు.. కానీ శిశువు మరణించింది. ఐదు రోజుల తర్వాత ఆమె ఆసుపత్రి నుండి డిశ్చార్జ్ చేయబడింది.. అయితే నూర్జహాన్‌కు చాలా రోజులుగా కడుపు నొప్పి వ‌స్తుంది. కుట్లు నుండి చీము రావడం ప్రారంభమైంది. తర్వాత 10 రోజులకు డయాగ్నోస్టిక్ సెంటర్‌లో అల్ట్రాసౌండ్, CT స్కాన్ చేశారు. రక్తాన్ని శుభ్రపరిచే గుడ్డ గర్భాశయంలో మిగిలిపోయిందని నివేదికలు తెలిపాయి.

ఏవాన్ ఆసుపత్రి వైద్యులు ఆపరేషన్ సమయంలో గుడ్డను క‌డుపులోనే వ‌దిలివేసి ఆపై కుట్లు వేశారు. దీని కారణంగా, నూర్జహాన్ గర్భాశయంలో తీవ్రమైన ఇన్ఫెక్షన్ వ్యాపించింది. ఆ తర్వాత మరో ఆస్పత్రిలో చికిత్స అందించగా ఆమె ప్రాణాలను కాపాడగలిగారు. అయితే.. ఆపరేషన్‌లో కణజాలాన్ని తొలగించారు. శనివారం తాహిర్ తన వీడియోను డీఎంకు చూపించాడు. ఆ తర్వాత డీఎం చీఫ్ మెడికల్ ఆఫీసర్ డాక్టర్ విశ్రమ్ సింగ్‌ను చర్యలు తీసుకోవాలని కోరారు. మధ్యాహ్నానికి అక్క‌డ‌కు చేరుకున్న బృందం ఆసుపత్రిని సీల్ చేసింది. తరువాత తాహిర్ ఫిర్యాదుపై భోజిపురా పోలీస్ స్టేషన్‌లో షాబాజ్, వైద్యులపై ఉద్దేశపూర్వకంగా ప్రాణహాని, నిర్లక్ష్యం, గాయపరచడం, బెదిరింపు సెక్షన్ల కింద ఎఫ్‌ఐఆర్ నమోదు చేయబడింది.