హైదరాబాద్‌లో దారుణం.. మహిళపై సామూహిక అత్యాచారం

హైదరాబాద్‌లోని తార్నాకలో ఓ మహిళపై సామూహిక అత్యాచారం ఘటన తీవ్ర సంచలనం రేగింది. చిన్న, పెద్ద తేడా లేకుండా కామాంధులు.. ఆడవారు కనిపించారంటే చాలు అదును చూసి వారిపై లైంగిక దాడికి పాల్పడుతున్నారు. తాజాగా నగరంలో రాత్రి సమయంలో ఇంటికి వెళ్తున్న ఓ మహిళను లిఫ్ట్‌ ఇస్తానని నమ్మించి ఓ వ్యక్తి అపహరించుకుపోయాడు. ఆపై తన స్నేహితులతో అత్యాచారానికి పాల్పడ్డాడు. ఈ ఘటన ఆలస్యంగా వెలుగులోకి వచ్చింది. ఈ ఘటనలో ఐదుగురు వ్యక్తులను పోలీసులు అరెస్టు చేసి, రిమాండ్​కు తరలించారు. ఈ ఘటనకు సంబంధించిన వివరాలను ఈస్ట్​ జోన్​ డీసీపీ సునీల్​దత్​ వెల్లడించారు.

మెకానిక్​గా పనిచేస్తున్న బర్నే ఏసు(32) ఈనెల 7న అర్ధరాత్రి తార్నాక​ నుంచి ప్రశాంత్​నగర్​కు బైక్‌పై వెళుతున్నాడు. అదే ప్రాంతంలో ఓ మహిళ బస్‌ స్టాప్‌​లో బస్సు కోసం ఎదురుచూస్తోంది. అటుగా వెళ్తున్న ఏసు, మహిళ ఒంటరిగా ఉండటం గమనించి ఆమె దగ్గరకు వెళ్లాడు. ఆమెతో మాట కలిపాడు. లాలాపేటలో దింపుతానని నమ్మించి, తన బైక్‌పై ఎక్కించుకున్నాడు. ఆమెను తప్పుదోవ పట్టించి ప్రశాంత్​ నగర్​ రైల్వే క్వార్టర్స్​ సమీపంలో నిర్మానుష్య ప్రాంతానికి తీసుకెళ్లాడని పోలీసు అధికారి తెలిపారు.

అనంతరం ఆమెపై అత్యాచారానికి పాల్పడ్డ ఏసు.. ఆ తర్వాత తన ఫ్రెండ్‌ సీత మధుయాదవ్​(31)ను పిలిపించి ఇద్దరు కలిసి ఆమెపై అత్యాచారం చేశారు. శ్రీగిరి ప్రశాంత్​ కుమార్​(20), రోహిత్​(19), తరుణ్​ కుమార్​(20)లను పిలిపించి ఐదుగురు కలిసి ఆమెపై సామూహిక లైంగిక దాడికి దిగారు. అనంతరం మధుయాదవ్​ ఆమెను తార్నాకలో దింపి అక్కడి నుంచి పరారయ్యాడు అని డీసీపీ తెలిపారు. బాధితురాలి ఫిర్యాదు మేరకు లాలాగూడ పోలీస్​ స్టేషన్​లో కేసు నమోదు చేసుకున్న పోలీసులు సీసీటీవీ ఫుటేజ్​ ఆధారంగా ఐదుగురు నిందితులను గుర్తించారు. ఆదివారం రోజున వారిని అరెస్టు చేసి, రిమాండ్​కు తరలించారు.