అన్నను గొడ్డలితో నరికి చంపిన 14 ఏళ్ల బాలిక.. అబ్బాయిలతో ఫోన్‌ మాట్లాడొద్దన్నాడని..

అబ్బాయిలతో ఫోన్‌ మాట్లాడొద్దని హెచ్చరించాడన్న కోపంతో 14 ఏళ్ల బాలిక తన అన్న(18)ను గొడ్డలితో నరికి చంపింది. ఛత్తీస్‌గఢ్‌లోని ఖైరాఘడ్-చుయిఖదాన్-గండాయ్ జిల్లాలో ఈ దారుణ ఘటన చోటు చేసుకుంది. అబ్బాయిలతో మొబైల్ ఫోన్‌లో మాట్లాడవద్దని చెప్పినందుకు బాలిక తన అన్నయ్యను గొడ్డలితో నరికి చంపిందని పోలీసులు తెలిపారు. శుక్రవారం చుయిఖదాన్ పోలీస్ స్టేషన్ పరిధిలోని అమ్లిదిహ్కల గ్రామంలో జరిగిన నేరానికి బాలికని అదుపులోకి తీసుకున్నట్లు పోలీసులు శనివారం ఒక ప్రకటనలో తెలిపారు.

ఘటన జరిగిన సమయంలో తాను, తన సోదరుడు (18) ఇంట్లో ఉన్నారని, మిగతా కుటుంబ సభ్యులు పని నిమిత్తం బయటకు వెళ్లారని బాలిక పోలీసులకు తెలిపింది. ఆమె అబ్బాయిలతో మొబైల్ ఫోన్‌లో మాట్లాడిందని ఆమె సోదరుడు ఆమెను మందలించాడు. ఇకపై ఫోన్ ఉపయోగించవద్దని కోరాడు. మందలించడంతో కోపోద్రిక్తుడైన బాలిక నిద్రలోకి జారుకున్న తన సోదరుడి గొంతుపై గొడ్డలితో కొట్టింది. ఆమె సోదరుడు అక్కడికక్కడే మృతి చెందినట్లు పోలీసులు తెలిపారు.

బాలిక స్నానం చేసి, తన బట్టలపై ఉన్న రక్తపు మరకలను శుభ్రం చేసి, తన సోదరుడు హత్యకు గురయ్యాడని ఇరుగుపొరుగు వారికి చెప్పింది. గ్రామస్థుల సమాచారంతో పోలీసులు సంఘటనా స్థలానికి చేరుకుని ఘటనపై విచారణ చేపట్టారు. పోలీసుల విచారణలో అతడిని హత్య చేసినట్లు బాలిక అంగీకరించిందని వాంగ్మూలంలో పేర్కొంది. ఈ ఘటనపై పోలీసులు కేసు నమోదు చేసి తదుపరి దర్యాప్తు చేపట్టారు.