దీపావళికి ఊరెళ్ళాలనే ఆరాటం.. రైల్వే స్టేషన్ లో విషాదం

గుజరాత్‌లోని సూరత్ రైల్వే స్టేషన్‌లో శనివారం జరిగిన తొక్కిసలాటలో ఒకరు మృతి చెందగా, పలువురు గాయపడ్డారు. దీపావళికి స్వగ్రామాలకు వెళ్లే జనం వివిధ రాష్ట్రాలకు వెళ్లేందుకు స్టేషన్‌కు భారీగా తరలివచ్చారు. రైలు ఎక్కుతుండగా తొక్కిసలాట జరిగి ఒకరు మృతి చెందగా, మరికొందరు స్పృహతప్పి పడిపోయారు. చాలా మంది గాయపడ్డారు. సూరత్ ఎంపీ, రాష్ట్ర రైల్వే మంత్రి దర్శన జర్దోష్ క్షతగాత్రులను పరామర్శించేందుకు ఆసుపత్రికి వెళ్లారు.

పండుగ సీజన్‌ను దృష్టిలో ఉంచుకుని ఈ సంవత్సరం ప్రత్యేక రైళ్లను వేశామని అధికారులు తెలిపారు. పశ్చిమ రైల్వే ముంబై, గుజరాత్, మధ్యప్రదేశ్‌లోని కొన్ని ప్రాంతాలను కవర్ చేస్తూ సుమారు 400 ట్రిప్పులతో 46 ప్రత్యేక రైళ్లను నడిపింది. 7 లక్షల మంది ప్రయాణికులు తమ గమ్యస్థానాలకు చేరుకుంటున్నారు. పండుగ రద్దీని దృష్టిలో ఉంచుకుని, క్రౌడ్ మేనేజ్‌మెంట్ కోసం ప్రత్యేక ఏర్పాట్లు చేసినా ఇలాంటి ఘటన చోటు చేసుకుంది. సూరత్ స్టేషన్‌లో దాదాపు 165 మంది ఆర్‌పిఎఫ్, జిఆర్‌పి జవాన్‌లను మోహరించారు.