హోమ్‌లోన్‌ తీసుకున్న వారికి ఎస్‌బీఐ గుడ్‌న్యూస్‌

హోమ్‌ లోన్‌ తీసుకున్న వారికి స్టేట్‌ బ్యాంక్‌ ఆఫ్‌ ఇండియా గుడ్‌న్యూస్‌ చెప్పింది. ఇటీవల రిజర్వ్‌ బ్యాంక్‌ ఆఫ్‌ ఇండియా రెపోరేటును 25 బేసిస్‌ పాయింట్లు తగ్గించి 6 శాతానికి చేర్చిన విషయం తెలిసిందే. ఈ క్రమంలోనే బ్యాంకులూ ఈ ప్రయోజనాన్ని లోన్‌ తీసుకున్న వారికి బదిలీ చేస్తున్నాయి. పలు బ్యాంకులు ఫిక్స్‌డ్‌ డిపాజిట్లపై రేట్లనూ తగ్గించడం ప్రారంభించాయి. రెపోరేటు తగ్గడంతో తాజాగా ఎస్‌బీఐ వడ్డీ రేట్లను తగ్గించింది. ఇవి ఏటి నుంచి అమల్లోకి రానున్నాయి. కొత్తగా రుణాలు తీసుకునేవారితో పాటు ఇప్పటికే తీసుకున్న వారికి ఈ రేట్లు వర్తిస్తాయి. కాగా హెచ్‌డీఎఫ్‌సీ, బీవోఐ బ్యాంకులు ఇంతకుముందే వడ్డీ రేట్లను తగ్గించాయి.

ఎస్‌బీఐలో హోంలోన్‌ కొత్త వడ్డీ రేట్లు 8.25 శాతం నుంచి ప్రారంభం కానున్నాయి. ఈబీఎల్‌ఆర్‌నూ 25 బేసిస్‌ పాయింట్లు తగ్గించి 8.65 శాతానికి తీసుకొచ్చింది. అలాగే ఎస్‌బీఐ దాని డిపాజిట్ రేట్లను 10 నుండి 25 బేసిస్ పాయింట్లు తగ్గించింది. 1–2 సంవత్సరాల కాలపరిమితితో రూ. 3 కోట్ల వరకు స్థిర డిపాజిట్లపై ఇప్పుడు 6.70 శాతం వడ్డీ ఉంటుంది, రెండు నుండి మూడు సంవత్సరాల కంటే తక్కువ డిపాజిట్లపై 6.90 శాతం ఆదాయం లభిస్తుంది, ఇది మునుపటి 7 శాతం నుండి తగ్గింపు. 1–2 సంవత్సరాల డిపాజిట్లపై 7 శాతం నుండి 6.80 శాతం వడ్డీ రేటు తగ్గుతుంది. ఎస్‌బీఐ యొక్క ప్రత్యేక డిపాజిట్ పథకాలలో కూడా సర్దుబాట్లు జరిగాయి. 444 రోజుల 'అమృత్ వృష్టి' డిపాజిట్ పథకం ఇప్పుడు 7.05 శాతం ఆఫర్ చేస్తుంది, సీనియర్ సిటిజన్లు 7.55 శాతం, సూపర్ సీనియర్ సిటిజన్లు 7.65 శాతం సంపాదిస్తారు.