మళ్లీ పెరిగిన కమర్షియల్ సిలిండర్ ధర.. 2 నెలల్లో రెండవసారి
వాణిజ్య ఎల్‌పీజీ సిలిండర్ వినియోగదారులకు చమురు కంపెనీలు బిగ్‌ షాక్‌ ఇచ్చాయి. ఎల్‌పీజీ సిలిండర్ల ధరను రూ.100కుపైగా పెంచాయి.
By అంజి Published on 1 Nov 2023 7:33 AM IST
మళ్లీ పెరిగిన కమర్షియల్ సిలిండర్ ధర.. 2 నెలల్లో రెండవసారి
వాణిజ్య ఎల్‌పీజీ సిలిండర్ వినియోగదారులకు చమురు కంపెనీలు బిగ్‌ షాక్‌ ఇచ్చాయి. ఎల్‌పీజీ సిలిండర్ల ధరలను రూ.100కుపైగా పెంచాయి. ప్రభుత్వ రంగ చమురు మార్కెటింగ్ కంపెనీలు (OMCలు) బుధవారం దేశంలోని పలు చోట్ల వాణిజ్య ఎల్‌పీజీ సిలిండర్ల ధరలను తక్షణమే అమలులోకి వచ్చేలా రూ.100కు పైగా పెంచాయి. గత రెండు నెలల్లో కమర్షియల్ ఎల్‌పీజీ సిలిండర్ ధరలు పెంచడం ఇది రెండోసారి. వాణిజ్య, గృహ ఎల్‌పీజీ సిలిండర్ల ధరలను ప్రతి నెల మొదటి రోజున చమురు కంపెనీలు నెలవారీ సవరణ చేస్తాయి.
తాజా సవరణతో, 19 కిలోల వాణిజ్య ఎల్‌పీజీ సిలిండర్ ధర ఇప్పుడు ఢిల్లీలో రూ.1,731కి బదులుగా రూ.1,833 అవుతుంది. ముంబైలో కమర్షియల్ ఎల్‌పీజీ సిలిండర్ రూ.1,785.50, కోల్‌కతాలో రూ.1,943, చెన్నైలో రూ.1,999.50లకు అందుబాటులో ఉంటుంది. అక్టోబర్‌లో వాణిజ్య ఎల్‌పీజీ సిలిండర్ల ధరలు ముంబైలో రూ.1,684, కోల్‌కతాలో రూ.1,839.50, చెన్నైలో రూ.1,898గా ఉన్నాయి. అక్టోబర్ 1న కమర్షియల్ గ్యాస్ సిలిండర్ ధర రూ. 209 మేర పెరిగింది. అంటే రెండు నెలల కాలంలో ఈ సిలిండర్ రేటు ఏకంగా రూ. 310 మేర పైకి చేరింది.
గృహావసరాల వంటశాలలలో వంట అవసరాల కోసం ఉపయోగించే దేశీయ ఎల్‌పీజీ ధర, ఢిల్లీలో 14.2 కిలోల సిలిండర్‌పై రూ.903 వద్ద ఎటువంటి మార్పు లేకుండా ఉంది. ఈ సిలిండర్ రేటులో ఎలాంటి మార్పు లేదు. ఈ సిలిండర్ రేటు చివరిగా ఆగస్ట్ నెల 30న తగ్గింది.
