నా ఫోన్ ట్యాప్ చేస్తున్నారు.. అందుకే 12 సిమ్‌లు వాడుతున్నా: వైసీపీ ఎమ్మెల్యే
YCP MLA Kotamreddy Sridhar Reddy alleges phone tapping. నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి.. నిత్యం ఏదో రకంగా వార్తల్లో నానుతూనే ఉంటారు.
By అంజి Published on 29 Jan 2023 9:37 AM GMT
నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి.. నిత్యం ఏదో రకంగా వార్తల్లో నానుతూనే ఉంటారు. తాజాగా సంచలన వ్యాఖ్యలతో ఆంధ్రప్రదేశ్‌లోని అధికార వైఎస్సార్సీపీలో శ్రీధర్‌రెడ్డి మరోసారి అలజడి రేపారు. గత మూడు నెలలుగా తన ఫోన్‌ను ట్యాప్ చేస్తూ ఇంటెలిజెన్స్ అధికారులు తనపై నిఘా పెట్టారని శ్రీధర్‌రెడ్డి ఆరోపించారు. ఈ విషయం తనకు ముందే తెలుసని, అందుకే వేరే ఫోన్ ఉపయోగించి రహస్యాల గురించి చర్చిస్తున్నానని చెప్పారు. ''మూడు నెలలుగా నా ఫోన్‌ని ట్యాప్ చేస్తున్నారు. దీని గురించి నాకు ముందే తెలుసు కాబట్టి నా రహస్యాల గురించి మాట్లాడటానికి వేరే ఫోన్. 12 సిమ్‌లను ఉపయోగిస్తున్నాను'' అని ఎమ్మెల్యే శ్రీధర్ రెడ్డి చెప్పారు.
అధికార పార్టీకి చెందిన ఎమ్మెల్యేపై నిఘా విభాగం నిఘా పెట్టాల్సిన అవసరం ఏమిటని ఎమ్మెల్యే ప్రశ్నించారు. రాష్ట్ర ప్రభుత్వం ఇజ్రాయెలీ గూఢచారి సాఫ్ట్‌వేర్ పెగాసస్‌ని ఉపయోగిస్తున్నట్లుగా దూషించారు. పెగాసస్.. ఫేస్-టైమర్, టెలిగ్రామ్ కాల్‌లను రికార్డ్‌ చేయలేదని అన్నారు. తనపై క్రికెట్ బెటర్ కేసు ఉన్న సమయంలో, అప్పటి పోలీసు సూపరింటెండెంట్ కూడా తనపై నిఘా ఉంచారని పేర్కొన్నారు. అధికార పార్టీ ఎమ్మెల్యేపై ముగ్గురు అధికారులతో నిఘా అవసరమా? బదులుగా తనను పర్యవేక్షించడానికి తన నియోజకవర్గంలో ఒక ఐపీఎస్ అధికారిని నియమించండి అని వ్యంగ్యంగా వ్యాఖ్యానించారు.
