చింతూరు ఏజెన్సీ వాసుల కష్టాలు పట్టించుకునేదెన్నడు?

అల్లూరి సీతారామ రాజు జిల్లా పరిధిలోని చింతూరు ఏజెన్సీలో జాతీయ రహదారులపైకి వరదనీరు చేరడంతో గత నాలుగు రోజులుగా ఆంధ్రప్రదేశ్, తెలంగాణ, ఛత్తీస్‌గఢ్, ఒడిశా మధ్య రాకపోకలు పూర్తిగా నిలిచిపోయాయి. చింతూరు మండలం చట్టి వద్ద జాతీయ రహదారి-30, కుయిగూరు వద్ద 326వ నంబర్‌ రహదారి నీటమునిగిపోవడంతో రవాణాకు తీవ్ర అంతరాయం కలుగుతోంది. పోలవరం నష్టపరిహారం, పునరావాస ప్యాకేజీని తక్షణమే అమలు చేయాలని, తమ గ్రామాలను త్వరగా ఖాళీ చేసి తమకు భద్రత కల్పించాలని వరద బాధితులు కోరుతున్నారు.

భారీ వర్షాల కారణంగా ఉద్ధృతంగా ప్రవహిస్తున్న వరదల కారణంగా పూర్వపు తూర్పుగోదావరి జిల్లాలో అపారమైన పంట నష్టం వాటిల్లింది. సుమారు 85,000 ఎకరాల వరి పొలాలు దెబ్బతిన్నాయి. 1,250 ఎకరాల్లో ఉద్యాన, కూరగాయల పంటలు దెబ్బతిన్నాయి. అల్లూరి సీతారామ రాజు జిల్లా కలెక్టర్ దినేష్ కుమార్ ముంపునకు గురైన చింతూరు మండల ప్రజలకు వరద సాయం అందజేస్తున్నట్లు తెలిపారు. మంగళవారం ఎటపాక తహశీల్దార్ కార్యాలయంలో సహాయనిధి పంపిణీపై కలెక్టర్ సమీక్షా సమావేశం నిర్వహించారు. నిత్యావసర సరుకులను యుద్ధప్రాతిపదికన సరఫరా చేయాలని అధికారులను ఆదేశించారు.