తిరుమల లడ్డూ వ్యవహారం.. సుప్రీం కీలక ఆదేశాలు

తిరుపతి లడ్డూలను తయారు చేసేందుకు గత ఆంధ్రప్రదేశ్ ప్రభుత్వం జంతువుల కొవ్వుతో కూడిన నాసిరకం నెయ్యిని ఉపయోగించిందన్న ఆరోపణలపై సీబీఐ పర్యవేక్షణలో ప్రత్యేక దర్యాప్తు బృందం (సిట్) విచారణకు సుప్రీంకోర్టు శుక్రవారం ఆదేశించింది. తిరుమల లడ్డూ కల్తీ వ్యవహారంలో నిజానిజాలు తేల్చేందుకు స్వతంత్ర దర్యాప్తునకు సుప్రీంకోర్టు ఆదేశాలు ఇచ్చింది. ఐదుగురు సభ్యులతో స్పెషల్‌ ఇన్వేస్టిగేషన్‌ టీమ్‌ (సిట్‌)ని ఏర్పాటు చేసి అందులో సీబీఐ నుంచి ఇద్దరు, రాష్ట్ర ప్రభుత్వం నుంచి ఇద్దరు అధికారులు, ఎఫ్‌ఎస్‌ఎస్‌ఏఐ నుంచి ఒక నిపుణుడిని ఉంచాలని సూచించింది. సీబీఐ డైరెక్టర్‌ పర్యవేక్షణలో విచారణకు ఆదేశించింది.

ఈ లడ్డూ వ్యవహారం పొలిటికల్‌ డ్రామాగా మారాలని తాము కోరుకోవడం లేదని స్పష్టం చేసింది. తిరుమల లడ్డూపై వచ్చిన ఆరోపణలు ప్రపంచవ్యాప్తంగా ప్రజల మనోభావాలను దెబ్బతీసే అవకాశం ఉందని పేర్కొంటూ, సిట్ దర్యాప్తును సీబీఐ డైరెక్టర్ పర్యవేక్షిస్తారని సుప్రీంకోర్టు పేర్కొంది. కోట్లాది మంది ప్రజల మనోభావాలను నివృత్తి చేసేందుకు, రాష్ట్ర పోలీసు, సీబీఐ, ఎఫ్‌ఎస్‌ఎస్‌ఏఐ ప్రతినిధులతో కూడిన స్వతంత్ర సిట్‌తో దర్యాప్తు చేయవలసి ఉంటుందని న్యాయమూర్తులు బిఆర్ గవాయ్, కెవి విశ్వనాథన్‌లతో కూడిన ధర్మాసనం పేర్కొంది. ప్రఖ్యాతి గాంచిన శ్రీవేంకటేశ్వర ఆలయానికి చెందిన కోట్లాది మంది భక్తుల మనోభావాలను చూరగొనేందుకే ఈ ఆదేశాలను జారీ చేస్తున్నట్లు అత్యున్నత న్యాయస్థానం స్పష్టం చేసింది.

గత నెలలో వైఎస్‌ఆర్‌సీపీ హయాంలో లడ్డూల తయారీకి ఉపయోగించిన నెయ్యిలో జంతువుల కొవ్వు, చేపనూనె ఉన్నట్లు ల్యాబ్ నివేదికను ఉటంకిస్తూ ఆంధ్రప్రదేశ్ ముఖ్యమంత్రి చంద్రబాబు నాయుడు పేర్కొన్న నేపథ్యంలో గత నెలలో వివాదం చెలరేగింది. అంతకుముందు విచారణలో, నిశ్చయాత్మకమైన రుజువు లేకుండా క్లెయిమ్‌తో ప్రజల్లోకి వెళ్లడంపై సుప్రీం కోర్టు ముఖ్యమంత్రిపై తీవ్ర స్థాయిలో విరుచుకుపడింది. లడ్డూలను తయారు చేయడానికి జంతువుల కొవ్వును ఉపయోగించినట్లు ఖచ్చితమైన రుజువు లేదని, తిరస్కరించబడిన నెయ్యి నమూనాలలో మలినాలను గుర్తించినట్లు ల్యాబ్ నివేదిక ప్రాథమికంగా సూచించిందని అత్యున్నత న్యాయస్థానం పేర్కొంది. సుప్రీంకోర్టు వ్యాఖ్యల తర్వాత, రాష్ట్ర ప్రభుత్వం ఏర్పాటు చేసిన సిట్ తన విచారణను నిలిపివేసింది.