చంద్రగ్రహణం ఎఫెక్ట్..రేపు 10 గంటల పాటు మూతపడనున్న శ్రీవారి ఆలయం

చంద్రగ్రహణం కారణంగా రేపు తిరుమల శ్రీవారి ఆలయ తలుపులను సుమారు పదిన్నర గంటల పాటు మూసివేస్తున్నట్లు టీటీడీ ప్రకటించింది. గ్రహణ ప్రభావం దృష్ట్యా ఉదయం 9 గంటల నుండి రాత్రి 7:30 గంటల వరకు స్వామివారి దర్శనాలు నిలిపివేయనున్నారు. ఈ క్రమంలో రేపు నిర్వహించాల్సిన వీఐపీ బ్రేక్ దర్శనాలు, ఆర్జిత సేవలు మరియు ప్రత్యేక ప్రవేశ దర్శనాలను అధికారులు పూర్తిగా రద్దు చేశారు. తిరుపతిలో జారీ చేసే రేపటి సర్వదర్శనం టోకెన్ల కోటాను కూడా నిలిపివేస్తున్నట్లు స్పష్టం చేశారు.

మరోవైపు, తిరుమలలో భక్తుల రద్దీ ప్రస్తుతం కొనసాగుతోంది. వైకుంఠం క్యూ కాంప్లెక్స్‌లోని కంపార్ట్‌మెంట్లన్నీ నిండిపోవడంతో భక్తులు క్యూలైన్లలో వేచి ఉన్నారు. టోకెన్లు లేని భక్తులకు సర్వదర్శనం కోసం సుమారు 12 గంటల సమయం పడుతోంది. నిన్న ఒక్కరోజే 83,122 మంది భక్తులు స్వామివారిని దర్శించుకోగా, రూ. 4.49 కోట్ల హుండీ ఆదాయం లభించింది. రేపు రాత్రి గ్రహణం వీడిన తర్వాత ఆలయ శుద్ధి మరియు సంప్రదాయ పూజలు నిర్వహించి, రాత్రి 7:30 గంటల తర్వాతే భక్తులను తిరిగి దర్శనానికి అనుమతిస్తారు.