బీజేపీ ఎంత ప్రయత్నించినా ఏపీలో ఒక్క సీటు కూడా గెలవలేదు

ఆంధ్రప్రదేశ్‌లో దుష్పరిపాలన జరుగుతోందన్న బీజేపీ జాతీయ అధ్యక్షుడు జేపీ నడ్డా వ్యాఖ్య‌ల‌ను మాజీ మంత్రి, వైఎస్ఆర్ కాంగ్రెస్ పార్టీ ఎమ్మెల్యే పేర్ని నాని ఆదివారం తోసిపుచ్చారు. ఒక జాతీయ పార్టీకి అధ్య‌క్షుడిగా ఉన్న ఆయ‌న‌ బాధ్యతతో మాట్లాడాలని కోరారు. శ్రీకాళహస్తిలో జరిగిన బహిరంగ సభలో నడ్డా చేసిన వ్యాఖ్యలపై స్పందిస్తూ.. బీసీ, ఎస్సీ, ఎస్టీ, మైనార్టీ, ఆర్థికంగా వెనుకబడిన తరగతుల వారి బ్యాంకు ఖాతాల్లోకి నేరుగా రూ.2.16 లక్షల కోట్లను జగన్ ప్రభుత్వం జమ చేసింది. ప్రజల కోసం ఇన్ని సంక్షేమ పథకాలు అమలు చేసిన ఘనత వైఎస్సార్‌సీపీ ప్రభుత్వానిదేన‌న్నారు. బీజేపీ పాలనలో ఉన్న ఏ రాష్ట్రంలోనైనా ఈ మొత్తంలో సగం అయినా ఖర్చు చేసిందా? అని ప్ర‌శ్నించారు. రాష్ట్రంలో ఆర్థిక పరిస్థితి సరిగా లేకపోయినా.. ప్రభుత్వం అన్ని వర్గాల ప్రజలకు అండగా నిలిచి అవినీతి రహిత సుపరిపాలన అందిస్తున్నామని చెప్పారు. కర్నాటకలో బీజేపీ అవినీతి ప్రభుత్వాన్ని ఓడించి అక్కడి ప్రజలు గుణపాఠం చెప్పారని, ఆంధ్రప్రదేశ్‌లో బీజేపీ టీజేపీగా మారిందని (కొంతమంది టీడీపీ రాజ్యసభ సభ్యులు బీజేపీలో చేరడంతో) అన్నారు. బీజేపీ ఎంత ప్రయత్నించినా ఆంధ్రప్రదేశ్‌లో ఒక్క సీటు కూడా గెలవలేద‌ని ఆయన అన్నారు. “మిస్టర్ నడ్డా, ఢిల్లీలో ప్రతిపక్షాలు మీపై అనేక ఆరోపణలు చేసి పార్లమెంటును కుదిపేస్తున్నాయి. మీకు సమర్ధత ఉంటే వారికి సమాధానం చెప్పడానికి ప్రయత్నించండి” అని ఆయన అన్నారు.