ఆ గ్రామంలో స్కూల్‌ లేకపోవడంపై.. ఏపీ సర్కార్‌కు ఎన్‌హెచ్‌ఆర్సీ నోటీసు

ఆంధ్రప్రదేశ్‌లోని అల్లూరి సీతారామరాజు (ఏఎస్‌ఆర్‌) జిల్లాలోని జాజులబంధ గిరిజన కుగ్రామంలో అధికారులకు ఎన్ని అభ్యర్థనలు చేసినప్పటికీ.. ఏ పాఠశాలను కూడా ఏర్పాటు చేయలేకపోయారనే నివేదికలపై ఎన్‌హెచ్‌ఆర్‌సి శుక్రవారం ఆంధ్రప్రదేశ్ ప్రభుత్వానికి నోటీసు జారీ చేసింది. నేషనల్ హ్యూమన్ రైట్స్ కమీషన్ (NHRC) ప్రకారం.. పిల్లలు పాఠశాలకు వెళ్లడానికి ఆరు కిలోమీటర్ల కఠినమైన భూభాగాల గుండా నడవలేక, వారు తమ తల్లిదండ్రులతో కలిసి పని చేయడానికి ఇష్టపడుతున్నారు. ఓ మీడియా ప్రచురించిన కథనాన్ని ఎన్‌హెచ్‌ఆర్‌సి సుమోటోగా స్వీకరించింది.

మీడియా నివేదికలో ఉన్న అంశాలు నిజమైతే, పిల్లల విద్యాహక్కుకు సంబంధించిన తీవ్ర ఆందోళనను లేవనెత్తుతున్నట్లు కమిషన్ పేర్కొంది. దీని ప్రకారం నాలుగు వారాల్లోగా సమగ్ర నివేదిక ఇవ్వాలని ఆంధ్రప్రదేశ్ ప్రభుత్వ ప్రధాన కార్యదర్శికి నోటీసు జారీ చేసింది. వార్తా నివేదికలో లేవనెత్తిన సమస్యను పరిష్కరించడానికి తీసుకున్న చర్యలు/ప్రతిపాదిత చర్యలు అలాగే రాష్ట్రంలోని ఇతర ప్రాంతాల ప్రజలు ఇలాంటి ఇబ్బందులు ఎదుర్కొంటున్నారని తెలుసుకోవాలని కమిషన్ పేర్కొంది.

మే 31న నిర్వహించిన మీడియా కథనం ప్రకారం.. గిరిజన కుగ్రామంలో 1-10 సంవత్సరాల మధ్య వయస్సు గల 60 మంది పిల్లలు ఉన్నారు. ఒక స్వచ్ఛంద సంస్థ తాత్కాలిక పాఠశాల నిర్మాణానికి సుమారు 1.2 లక్షలు ఖర్చు చేసి పుస్తకాలు, బ్లాక్‌బోర్డ్‌లను కూడా అందించింది. ఇప్పుడు అక్కడ పిల్లలకు చదువు చెప్పడానికి ఉపాధ్యాయుడు అవసరం. తమ గ్రామంలో పాఠశాలను ఏర్పాటు చేయకుంటే ఇప్పటికైనా కనీసం ప్రభుత్వ ఉపాధ్యాయుడిని కేటాయించాలని అధికారులకు నచ్చజెప్పేందుకు మే 30న పిల్లలు, వారి తల్లిదండ్రులు వినూత్న నిరసన ప్రదర్శన నిర్వహించారు.