ఏపీ రాజధానిగా విశాఖే బెస్ట్.. ఎందుకో చెప్పానా?: బుగ్గన

దేశంలోనే మూడు పారిశ్రామిక కారిడార్లను అభివృద్ధి చేస్తున్న ఏకైక రాష్ట్రం ఆంధ్రప్రదేశ్ అని పేర్కొన్న ఆర్థిక మంత్రి బుగ్గన రాజేంద్రనాథ్ రెడ్డి రాష్ట్రాన్ని త్వరలో 'పారిశ్రామిక ప్రదేశ్'గా పిలుస్తామని మంగళవారం పేర్కొన్నారు. విశాఖపట్నంలో జరగనున్న ఏపీ గ్లోబల్ ఇన్వెస్టర్స్ సమ్మిట్‌కు సన్నాహకంగా బెంగళూరు రోడ్‌షో అని పిలువబడే బెంగళూరులో జరిగిన పారిశ్రామిక సమావేశంలో రాష్ట్ర ఆర్థిక మంత్రి ప్రసంగిస్తూ, ఆంధ్రప్రదేశ్‌లో పెట్టుబడులకు ఆకాశమే హద్దు అని అన్నారు.

''ఏపీకి మూడు రాజధానులు అనే కాన్సెప్ట్ వాస్తవం కాదు. అందుబాటులో ఉన్న మౌలిక వసతుల పరంగా చూస్తే ఏపీ రాజధానిగా విశాఖే బెస్ట్. రాష్ట్ర పాలన అంతా విశాఖ నుంచే జరుగుతుంది. మా ప్రభుత్వ నిర్ణయం కూడా అదే. విశాఖ ఇప్పటికే ఓడరేవు నగరంగా, కాస్మోపాలిటన్ నగరంగా గుర్తింపు పొందింది. భవిష్యత్ లోనూ విశాఖ అభివృద్ధికి ఎంతో అవకాశం ఉంది. కర్నూలు రెండో రాజధాని కాదు... అక్కడ కేవలం హైకోర్టు ప్రధాన బెంచ్ ఉంటుందంతే. కర్ణాటకలోని ధార్వాడ్, గుల్బర్బాలో హైకోర్టు బెంచ్ లు ఉన్నాయి. ఏపీలోనూ అంతే. 1937 శ్రీబాగ్ ఒప్పందంలో... రాజధాని ఒక చోట, హైకోర్టు మరొక చోట ఉండాలని పేర్కొన్నారు. కర్ణాటక అసెంబ్లీ సమావేశాలు బెళగాంలో ఒక సెషన్ నిర్వహిస్తారు. అదే విధంగా అసెంబ్లీ సమావేశాలు ఓ సెషన్ గుంటూరులో జరుగుతాయి'' అని బుగ్గన పేర్కొన్నారు.

వైఎస్‌ జగన్‌మోహన్‌రెడ్డి నేతృత్వంలోని రాష్ట్ర ప్రభుత్వం పారిశ్రామికాభివృద్ధికి పెద్దపీట వేస్తోందన్నారు. ''నీతి ఆయోగ్ ప్రకారం, పెట్టుబడులకు అనుకూలమైన వాతావరణం (సామాజిక, ఆర్థిక మరియు పర్యావరణ ప్రమాణాలు) విషయంలో ఆంధ్రప్రదేశ్ దేశంలో నాల్గవ స్థానంలో ఉందన్నారు. రాజేంద్రనాథ్ రెడ్డి మాట్లాడుతూ.. ఆంధ్రప్రదేశ్ బల్క్ డ్రగ్స్ పార్కును అభివృద్ధి చేస్తోందన్నారు. దక్షిణ భారతదేశంలో రూ.1,000 కోట్లకు పైగా విలువైన పార్కును కలిగి ఉన్న ఏకైక రాష్ట్రం ఆంధ్రప్రదేశ్ అని ఆయన పేర్కొన్నారు.

"రాష్ట్రం లోపల, వెలుపల రవాణా ఖర్చులను తగ్గించడానికి మేము 'ఇన్లాండ్ వాటర్‌వే పాలసీ'ని తీసుకువస్తాము" అని ఆర్థిక మంత్రి తెలిపారు. ఆంధ్రప్రదేశ్ చేనేత, జౌళి శాఖ ప్రిన్సిపల్ సెక్రటరీ సునీత ప్రసంగిస్తూ, రాష్ట్రం 14,974 ఎంఎస్‌ఎంఈ యూనిట్లతో 17.08 లక్షల బేళ్ల పత్తి ఉత్పత్తితో,ముడి పట్టులో రెండవ అతిపెద్ద ఉత్పత్తితో బలమైన టెక్స్‌టైల్ పర్యావరణ వ్యవస్థను కలిగి ఉందన్నారు.