పిన్నెల్లికి హైకోర్టులో ఊరట

వైఎస్సార్ కాంగ్రెస్ పార్టీ (వైఎస్‌ఆర్‌సీపీ) సీనియ‌ర్ నేత‌, పల్నాడు జిల్లా మాచర్ల నియోజకవర్గ ఎమ్మెల్యే పిన్నెల్లి రామకృష్ణారెడ్డికి హైకోర్టులో ఊరట ల‌భించింది. పోలింగ్ సమయంలో ఎలక్ట్రానిక్ ఓటింగ్ మెషిన్ (ఈవీఎం) ధ్వంసం చేసిన కేసులో జూన్ 5 వరకు ఆయనపై ఎలాంటి చర్యలు తీసుకోవ‌ద్ద‌ని ఆంధ్రప్రదేశ్ హైకోర్టు గురువారం పోలీసుల‌కు ఆదేశాలు జారీ చేసింది. ఈ కేసులో అరెస్టును తప్పించుకుని తిరుగుతున్న‌ ఎమ్మెల్యే పిన్నెల్లి ముందస్తు బెయిల్ పిటిషన్‌పై హైకోర్టు నిన్న‌ ఉత్తర్వులు జారీ చేసింది. జూన్ 5 వరకు పిన్నెల్లిని అరెస్ట్ చేయవద్దని పోలీసులను ఆదేశించిన కోర్టు.. తదుపరి విచారణను జూన్ 6కి వాయిదా వేసింది.

లంచ్‌ మోషన్‌ పిటిషన్‌ను దాఖలు చేసిన రామకృష్ణారెడ్డి తరపు న్యాయవాది నిరంజన్‌రెడ్డి వాదిస్తూ.. ఘటన మే 13న జరిగిందని.. అయితే మే 15న ఎఫ్‌ఐఆర్‌ నమోదైందని కోర్టుకు తెలిపారు. మొదట్లో గుర్తుతెలియని వ్యక్తులపై ఎఫ్‌ఐఆర్‌ నమోదు చేయగా.. సోషల్‌మీడియాలో ఓ వీడియో ప్రచారంలోకి రావడంతో ఎమ్మెల్యే ఏ1 నిందితుడిగా పేరు న‌మోదుచేశార‌న్నారు. సోషల్ మీడియాలో హల్ చల్ చేస్తున్న వీడియో మార్ఫింగ్ చేసి ఉండొచ్చని ఎమ్మెల్యే తరపు న్యాయవాది కోర్టుకు తెలిపారు.

మే 13న రాష్ట్ర అసెంబ్లీ, లోక్‌సభకు ఒకేసారి ఎన్నికల పోలింగ్ జరుగుతున్న సమయంలో మాచర్ల నియోజకవర్గంలోని పోలింగ్ బూత్‌లో ఈ ఘటన జరిగింది. ఎమ్మెల్యేను తక్షణమే అరెస్టు చేయాలని భారత ఎన్నికల సంఘం ఆదేశించడంతో గత రెండు రోజులుగా ఎనిమిది పోలీసు బృందాలు ఎమ్మెల్యే కోసం వెతుకుతున్నాయి. అంతకుముందు ఉదయం ఎన్నికల ప్రధాన అధికారి ఎం.కె. మీనా.. ఎమ్మెల్యే ఈవీఎంను ధ్వంసం చేసిన పాల్వాయి గేట్ పోలింగ్ బూత్ పోలింగ్ అధికారిని, అసిస్టెంట్ పోలింగ్ అధికారిని సస్పెండ్ చేయాలని ఆదేశించారు. ఘటనపై సమాచారం అందించడంలో అధికారులిద్దరూ విఫలమయ్యారని అన్నారు.

మాచర్ల నుంచి వరుసగా ఐదోసారి బరిలోకి దిగుతున్న రామకృష్ణారెడ్డిపై పోలీసులు ఇండియన్ పీనల్ కోడ్ (ఐపీసీ)లోని 143, 147, 448, 427, 353, 452, 120 (బి) సెక్షన్‌ల కింద కేసు నమోదు చేశారు. ప్రజాప్రాతినిధ్య చట్టం, 1951లోని సెక్షన్లు 131, 135, పబ్లిక్ ప్రాపర్టీకి నష్టం జరగకుండా నిరోధించే చట్టం (PDPP) చట్టం, 1984లోని సెక్షన్ 3 కింద కేసులు న‌మోదు చేశారు.

సీఈఓ మీనా ప్రకారం.. ఈ 10 సెక్షన్లు బలమైనవి. వీటి కింద శిక్ష ఏడేళ్ల వరకు ఉంటుంది. మొదట గుర్తుతెలియని వ్యక్తులపై కేసు నమోదు చేశామని.. అయితే వీడియో ఫుటేజీని పరిశీలించిన తర్వాత ఎమ్మెల్యేను ప్రధాన నిందితుడిగా పేర్కొన్నారని ఆయన అన్నారు. సంబంధిత కోర్టులో మెమో కూడా దాఖలు చేశారు.

మే 21న వైరల్‌గా మారిన వీడియోలో రామకృష్ణారెడ్డి పోలింగ్ బూత్‌లోకి వెళ్లి నేలపై ఉన్న ఈవీఎంను ధ్వంసం చేయడం కనిపించింది.