ఆక్వాలో సిండికేట్ మాఫియా.. రైతుల ఫిర్యాదుతో సీఎం జగన్‌ ఆగ్రహం

సిండికేట్‌ల దోపిడీపై ఆక్వా రైతులు, రైతు సంఘాల ఫిర్యాదులపై సీఎం వైఎస్‌ జగన్ చర్యలు తీసుకున్నారు. దీనిపై విచారణకు మంత్రులు, సీనియర్‌ ఐఏఎస్‌ అధికారులతో సీఎం జగన్‌ శనివారం ఉన్నతస్థాయి కమిటీని ఏర్పాటు చేశారు. ఇంధనం, పర్యావరణం, అటవీ, శాస్త్ర సాంకేతిక, గనులు, భూగర్భ శాస్త్రాల శాఖ మంత్రి పెద్దిరెడ్డి రామచంద్రారెడ్డి, విద్యాశాఖ మంత్రి బొత్స సత్యనారాయణ, పశుసంవర్ధక, పాడిపరిశ్రమ, మత్స్యశాఖల మంత్రి సీదిరి అప్పలరాజు, ముఖ్యకార్యదర్శి సమీర్‌శర్మ, స్పెషల్‌ సీఎస్‌లతో ప్యానెల్‌ను ఏర్పాటు చేశారు. ఎన్విరాన్‌మెంట్ అండ్ ఫారెస్ట్, నీరభ్ కుమార్ ప్రసాద్, స్పెషల్ సీఎస్, పశుసంవర్ధక, మత్స్యశాఖ, డాక్టర్ పూనమ్ మాలకొండయ్య, స్పెషల్ సీఎస్, ఎనర్జీ, కె.విజయానంద్ సభ్యులుగా ఉన్నారు. మత్స్యశాఖ కమిషనర్‌ కె. కన్నబాబు మెంబర్‌ కన్వీనర్‌గా వ్యవహరిస్తారు.

ఆక్వా రైతులను సిండికేట్‌లు దోపిడీ చేస్తున్నాయని ఆగ్రహం వ్యక్తం చేసిన ముఖ్యమంత్రి, ఫిర్యాదులను పరిశీలించి వారంలోగా నివేదిక సమర్పించాలని కమిటీని ఆదేశించారు. ఫిర్యాదులను సీరియస్‌గా తీసుకుని రైతులు ఆర్థికంగా నష్టపోతే ప్రభుత్వం ఊరుకోదని హెచ్చరించారు. రైతుల ప్రయోజనాలను కాపాడేందుకు ప్రభుత్వం ప్రత్యేక చట్టాలు తీసుకొచ్చినా సిండికేట్‌లు రైతులను నిలువుదోపిడీకి గురిచేస్తూ ఆర్థికంగా నష్టపోవాల్సి రావడం తీవ్ర విషయమన్నారు.

నివేదిక అందిన తర్వాత సిండికేట్లపై కఠిన చర్యలు తీసుకోవాలని ఉన్నతాధికారులను కోరారు. ఆక్వా సిండికేట్‌లుగా ఏర్పడిన వ్యాపారులు ఆక్వా ధరలను తగ్గించి, ఆక్వా సాగు చేసే దాణా ధరను పెంచి తీవ్ర ఆర్థిక నష్టాలకు గురిచేస్తున్నారని గతంలో ఆక్వా సాగుదారులు, రైతు సంఘాల ప్రతినిధులు ముఖ్యమంత్రిని కలిసి ఫిర్యాదు చేశారు.