బయో ఇథనాల్‌ యూనిట్‌కు సీఎం జగన్‌ శంకుస్థాపన

తూర్పుగోదావరి జిల్లా గోకవరం మండలం గుమ్మళ్లదొడ్డిలో రూ.270 కోట్లతో అస్సాగో ఇండస్ట్రీస్ ఏర్పాటు చేస్తున్న బయో ఇథనాల్ యూనిట్‌కు ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి శుక్రవారం శంకుస్థాపన చేశారు. రాజమహేంద్రవరం సమీపంలోని ఏపీఐఐసీ పారిశ్రామిక పార్కులో 20 ఎకరాల్లో ఏర్పాటు చేస్తున్న ఈ గ్రీన్‌ఫీల్డ్ యూనిట్ ద్వారా రోజుకు 200 కిలోలీటర్ల బయో ఇథనాల్ ఉత్పత్తి అవుతుంది. ఈ యూనిట్ ద్వారా ప్రత్యక్షంగా 100 మందికి, పరోక్షంగా 400 మందికి ఉపాధి లభిస్తుంది.

2025-26 నాటికి ప్రతి లీటరు పెట్రోల్‌లో 20 శాతం బయో-ఇథనాల్ మిశ్రమాన్ని తప్పనిసరి చేస్తూ కేంద్ర ప్రభుత్వం ఒక ఉత్తర్వును జారీ చేసింది, గ్రీన్ ఇంధన వినియోగాన్ని పెంచడం, ముడి చమురు దిగుమతి బిల్లును తగ్గించడం ద్వారా కార్బన్ ఉద్గారాలను తగ్గించే లక్ష్యంతో ఈ ప్రాజెక్ట్‌ చేపట్టింది. ప్రస్తుతం లీటర్ పెట్రోల్‌లో సగటు ఇథనాల్‌ శాతం 8.41 శాతంగా ఉంది. క్వింటాళ్ల ఇథనాల్‌ను ఉపయోగించడం ద్వారా 20,000 టన్నుల కార్బన్ ఉద్గారాలు తగ్గుతాయని అనేక అధ్యయనాలు వెల్లడించాయి. కేంద్ర ప్రభుత్వం భారీ లక్ష్యాలను పెట్టుకోవడంతో ఈ రంగంలో రాష్ట్రంలో పెట్టుబడులు పెట్టేందుకు పలు కంపెనీలు ముందుకు వస్తున్నాయి.

అస్సాగో ఇండస్ట్రీస్ మేనేజింగ్ డైరెక్టర్ ఆశిష్ గుర్నానీ మాట్లాడుతూ.. రాష్ట్ర ప్రభుత్వం భూ కేటాయింపుల నుండి అన్ని అనుమతులను త్వరితగతిన మంజూరు చేయడం ద్వారా తమ కంపెనీ ప్రత్యేక దృష్టి పెట్టిందని, ఈ పెట్టుబడుల ద్వారా ఆంధ్రప్రదేశ్ గ్రీన్ పునరుత్పాదక ఇంధన రంగంలో అగ్రగామిగా నిలుస్తుందని అన్నారు. భవిష్యత్తులో ఆంధ్రప్రదేశ్ ప్రత్యామ్నాయ ఇంధన హబ్‌గా నిలుస్తుందని ఆశాభావం వ్యక్తం చేశారు. ఈ యూనిట్ ద్వారా 500 మందికి ఉపాధి లభిస్తుందని, వ్యవసాయ ఆధారిత రాష్ట్రంగా ఉన్న ఆంధ్రప్రదేశ్ రైతులకు అదనపు ప్రయోజనం చేకూరుతుందన్నారు. ఆహార ధాన్యాలు, నూనెలు, వ్యవసాయ ఉత్పత్తుల వ్యర్థాలను వినియోగించుకోవడం ద్వారా ఇథనాల్‌తో రైతులు ఆర్థికంగా లబ్ధి పొందుతారని చెప్పారు.