ఏపీ ప్రజలకు సీఎం చంద్రబాబు భారీ శుభవార్త.. దీపావళి నుంచి ఉచిత సిలిండర్లు

ఆంధ్రప్రదేశ్‌ ప్రజలకు మరో గుడ్‌న్యూస్‌ చెప్పేందుకు సిద్ధమైంది చంద్రబాబు నేతృత్వంలోని ఎన్డీఏ ప్రభుత్వం. ఉచిత గ్యాస్‌ సిలిండర్ల హామీ అమలుపై ప్రభుత్వం కసరత్తులు చేస్తోంది. దీపావళి పండగ నుంచి ఈ స్కీమ్‌ని ప్రారంభిస్తామని సీఎం చంద్రబాబు ప్రకటించారు. ఈ నేపథ్యంలోనే పౌరసరఫరాలా శాఖ కార్యాచరణ రెడీ చేస్తోంది. రాష్ట్రంలో మొత్తం 1.55 కోట్ల డొమెస్టిక్‌ గ్యాస్‌ కనెక్షన్లు ఉన్నాయి. వైట్‌ రేషన్‌ కార్డు దారులకు ఈ స్కీమ్‌ను వర్తింపజేస్తే ఏడాదికి రూ.3,640 కోట్లు ఖర్చు అవుతాయని అంచనా.

దీపం, ఉజ్వల, ఇతర రాష్ట్ర ప్రభుత్వ పథకాల కింద కనెక్షన్లు తీసుకున్న 75 లక్షల మందికే పథకం అమలు చేస్తే ఏడాదికి రూ.1763 కోట్లు అవసరం కానుంది. ఈ పథకంకు ఎంత ఖర్చవుతుంది, ఎలా అమలు చేయాలి అనే వివరాలతో పౌరసరఫరాల శాఖ రిపోర్ట్‌ సిద్ధం చేస్తోంది. దీనిపై మంత్రుల కమిటీ సమావేశమై సిఫారసులు చేయనుంది. ఆ తర్వాత సీఎం చంద్రబాబు ఆమోదం తెలిపితే విధివిధానాలు వెలువడనున్నాయి. ఎన్నికల సమయంలో ఏడాదికి 3 ఉచిత సిలిండర్లు ఇస్తామని ఎన్డీఏ తన మేనిఫెస్టోలో ప్రకటించింది. ఈ విధంగా చూస్తే ఏడాదికి రూ.2,476 ల ప్రయోజనం చేకూరనుంది.