ఎన్టీఆర్ హెల్త్ వర్సిటీతో వైఎస్సార్‌కు ఏం సంబంధం? : చంద్రబాబు

విజ‌య‌వాడ‌లోని ఎన్టీఆర్ హెల్త్ యూనివ‌ర్సిటీ పేరును మార్చాల‌ని ప్ర‌భుత్వం నిర్ణ‌యించింది. ఎన్టీఆర్ హెల్త్ యూనివ‌ర్సిటీని వైఎస్ఆర్ హెల్త్ యూనివ‌ర్సిటీగా పేరు మార్పు చేస్తూ అసెంబ్లీలో స‌వ‌ర‌ణ బిల్లును ప్ర‌వేశ‌పెట్టాల‌ని ప్ర‌భుత్వం యోచిస్తోంది. పేరు మార్పు విష‌యంలో ఇప్ప‌టికే రాష్ట్ర ప్ర‌భుత్వం కేబినేట్ ఆమోదం కూడా తీసుకుంది.

ప్ర‌భుత్వం తీసుకున్న ఈ నిర్ణ‌యంపై తెలుగుదేశం పార్టీ అధినేత నారా చంద్ర‌బాబు నాయుడు మండిప‌డ్డారు. ఆరోగ్య వ‌ర్సిటీకి ఎన్టీఆర్ పేరు కొన‌సాగించాల్సిందేన‌న్నారు. పేరు మార్పు నిర్ణ‌యాన్ని వెన‌క్కి తీసుకోవాల‌ని డిమాండ్ చేశారు. ఎన్టీఆర్ పేరు తొలగింపు ప్రభుత్వ దివాళా కోరుతనానికి నిదర్శనమన్నారు. తెలుగుదేశం పార్టీ దీన్ని పూర్తిగా వ్యతిరేకిస్తోందని చెప్పారు. వైద్య విద్యకు ప్రత్యేక విశ్వవిద్యాలయం ఉండాలనే సంకల్పంతో నాటి ముఖ్యమంత్రి ఎన్టీఆర్ 1986లో ఈ హెల్త్ యూనివర్శిటీని ఏర్పాటు చేశార‌న్నారు.

'ఎన్టీఆర్ మరణానంతరం ఆయన జ్ఞాపకార్థం 1998లో మా ప్రభుత్వంలో ఈ సంస్థకు ఎన్టీఆర్ పేరు పెట్టాము. జాతీయ స్థాయిలో గుర్తింపు తెచ్చుకున్న ఎన్టీఆర్ హెల్త్ యూనివర్సిటీ పేరును మార్చాలని వైయస్సార్ తో సహా ఇప్పటి వరకు ఏ ముఖ్యమంత్రి ఆలోచన చెయ్యలేదు. 36 ఏళ్ల క్రితం ఎన్టీఆర్ ఆలోచనలతో ప్రారంభమైన ఈ విశ్వవిద్యాలయానికి ఇప్పుడు ఎన్టీఆర్ పేరు తొలగించి వైయస్సార్ పేరు పెట్టడం అర్థరహితం. మూడున్నరేళ్లలో కొత్తగా ఒక్క నిర్మాణం కూడా చేపట్టలేని జగన్ ప్రభుత్వం ఉన్న వాటికే పేర్లు మార్చుతోంది.

ఎన్టీఆర్ హెల్త్ వర్సిటీకి చెందిన రూ.450 కోట్ల నిధులను సైతం బలవంతంగా కాజేసిన జగన్ ప్రభుత్వం.. ఏ హక్కుతో వర్సిటీ పేరు మార్చుతుంది? కనీసం స్నాతకోత్సవం నిర్వహణకు కూడా నిధులు లేకుండా చేసిన వీళ్ళు ఇప్పుడు పేరు మార్చుతారా? అసలు ఎన్టీఆర్ హెల్త్ యూనివర్సిటీకి వైయస్సార్ కు ఏం సంబంధం ఉంది?

దశాబ్దాల నాటి సంస్థలకు ఉన్న పేర్లు మార్చి కొత్తగా మీ పేర్లు పెట్టుకుంటే మీకు పేరు రాదు సరికదా... ప్రజలు మీ దిగజారుడుతనాన్ని ఛీకొడతారు. చేతనైతే కొత్తగా సంస్థలను నిర్మించండి. ఇకనైనా ప్రభుత్వం పిచ్చి ఆలోచనలు మానుకుని హెల్త్ యూనివర్సిటీకి ఎన్టీఆర్ పేరును యధావిధిగా కొనసాగించాలి' అని చంద్రబాబు డిమాండ్ చేశారు.