ఏపీ, తెలంగాణలోని 4 ఎమ్మెల్సీ స్థానాలకు బీజేపీ అభ్యర్థుల ప్రకటన

మార్చి 13న జరగనున్న ఆంధ్రప్రదేశ్ శాసన మండలి, తెలంగాణ శాసన మండలిలోని నాలుగు గ్రాడ్యుయేట్లు, ఉపాధ్యాయుల నియోజకవర్గాలకు భారతీయ జనతా పార్టీ (బిజెపి) మంగళవారం అభ్యర్థులను ప్రకటించింది. ఆంధ్రప్రదేశ్‌లోని మూడు గ్రాడ్యుయేట్ల స్థానాలకు, తెలంగాణలో ఒక ఉపాధ్యాయ స్థానానికి పార్టీ అభ్యర్థులను ప్రకటించింది. ప్రకాశం-నెల్లూరు-చిత్తూరు నియోజకవర్గం బీజేపీ అభ్యర్థిగా సన్నారెడ్డి దయాకర్ రెడ్డి బరిలోకి దిగనున్నారు. కడప-అనంతపురం-కర్నూల్‌కు నగరూరు రాఘవేంద్ర, శ్రీకాకుళం-విజయనగరం-విశాఖపట్నం నియోజకవర్గాలకు పీవీఎన్‌ మాధవ్‌ను కాషాయ పార్టీ పోటీకి దింపింది.

తెలంగాణలో మహబూబ్‌నగర్‌-రంగారెడ్డి-హైదరాబాద్‌ టీచర్ల స్థానానికి ఎ.వెంకటనారాయణరెడ్డి అభ్యర్థిత్వాన్ని బీజేపీ ప్రకటించింది. రెండు తెలుగు రాష్ట్రాల్లోని ఇతర ఎమ్మెల్సీ స్థానాలకు అభ్యర్థులను తర్వాత ప్రకటించనున్నారు. ఆంధ్రప్రదేశ్‌లోని 13, తెలంగాణలోని 15 ఎమ్మెల్సీ స్థానాలకు ద్వైవార్షిక ఎన్నికల షెడ్యూల్‌ను భారత ఎన్నికల సంఘం (ఈసీఐ) గత వారం ప్రకటించింది. ఆంధ్రప్రదేశ్‌లోని ఎనిమిది స్థానిక అధికారుల నియోజకవర్గాలు, మూడు పట్టభద్రుల నియోజకవర్గాలు, రెండు ఉపాధ్యాయ నియోజకవర్గాలకు మార్చి 13న ఎన్నికలు జరగనున్నాయి.

తెలంగాణలో ఒక ఉపాధ్యాయ నియోజకవర్గం, ఒక స్థానిక అధికారుల నియోజకవర్గానికి కూడా పోలింగ్ జరగనుంది. ఈ ఎన్నికలకు ఫిబ్రవరి 16న నోటిఫికేషన్లు జారీ చేస్తామని.. నామినేషన్ల దాఖలుకు ఫిబ్రవరి 23 చివరి తేదీ. మరుసటి రోజు నామినేషన్ల పరిశీలన చేపడతామని ఈసీ ప్రకటించింది. నామినేషన్ల ఉపసంహరణకు ఫిబ్రవరి 27 చివరి తేదీ. మార్చి 13న పోలింగ్.. మార్చి 16న ఓట్ల లెక్కింపు చేపట్టనున్నారు.