ఏపీలో గ్రామ పంచాయతీల పునర్‌వర్గీకరణకు ప్రభుత్వ ఆమోదం..ఇకపై 4 విభాగాలుగా విభజన

ఆంధ్రప్రదేశ్ ప్రభుత్వం గ్రామ పంచాయతీల వ్యవస్థలో విప్లవాత్మక మార్పులకు శ్రీకారం చుడుతూ పునర్‌వర్గీకరణకు అనుమతినిస్తూ కీలక ఉత్తర్వులు జారీ చేసింది. ఇప్పటివరకు మూడు రకాలుగా ఉన్న పంచాయతీల విభజనను రద్దు చేసి, జనాభా మరియు వార్షిక ఆదాయం ప్రాతిపదికన నాలుగు కొత్త కేటగిరీలను ప్రవేశపెట్టింది. ఇందులో భాగంగా పట్టణ లక్షణాలు ఉన్న పెద్ద గ్రామాలను గుర్తిస్తూ ప్రత్యేకంగా 'రూర్బన్' (రూరల్ + అర్బన్) కేటగిరీని తీసుకురావడం విశేషం. ఈ కొత్త విధానం ప్రకారం, 10 వేల కంటే ఎక్కువ జనాభా మరియు రూ.కోటి పైన ఆదాయం ఉన్న గ్రామాలను రూర్బన్ పంచాయతీలుగా పరిగణిస్తారు (గిరిజన ప్రాంతాల్లో 5 వేల జనాభా ఉంటే సరిపోతుంది). ఇక్కడ పట్టణాలకు సమానంగా మౌలిక సదుపాయాలు కల్పించనున్నారు.

అలాగే, 3 వేల నుంచి 10 వేల లోపు జనాభా ఉండి, రూ.30 లక్షల నుంచి రూ.కోటి లోపు ఆదాయం ఉన్న గ్రామాలను గ్రేడ్-1 పంచాయతీలుగా, 2 వేల లోపు జనాభా ఉన్న గ్రామాలను గ్రేడ్-2గా, 1,500 కంటే తక్కువ జనాభా ఉన్న వాటిని గ్రేడ్-3 కేటగిరీలుగా విభజించారు. సీఎం చంద్రబాబు ఆదేశాల మేరకు రూపొందించిన ఈ నూతన వ్యవస్థ ద్వారా గ్రామీణ ప్రాంతాల్లో పరిపాలనను మరింత చేరువ చేయడమే కాకుండా, నిధుల కేటాయింపు మరియు అభివృద్ధి ప్రణాళికలను మరింత శాస్త్రీయంగా అమలు చేయవచ్చని ప్రభుత్వం భావిస్తోంది. ఈ మార్పుల వల్ల పెరుగుతున్న జనాభా అవసరాలకు అనుగుణంగా పౌర సేవలు మెరుగుపడతాయని అధికారులు ఆశాభావం వ్యక్తం చేస్తున్నారు.