Andhrapradesh: 6,100 కానిస్టేబుల్‌ పోస్టులు.. బిగ్‌ అప్‌డేట్‌

ఏపీలోని 6,100 కానిస్టేబుల్‌ పోస్టుల భర్తీకి నిర్వహించిన పీఈటీ, పీఎంటీ (దేహదారుఢ్య, శారీరక సామర్థ్య) పరీక్షలు నిన్నటితో ముగిశాయి. ప్రాథమిక పరీక్షలో అర్హత సాధించిన 95 వేల మందికి రాష్ట్ర వ్యాప్తంగా 2024 డిసెంబరు 30 నుంచి పోలీసు రిక్రూట్‌మెంట్‌ బోర్డు ఉమ్మడి జిల్లా కేంద్రాల్లో ఫిజికల్‌ ఎఫిషియన్సీ, ఫిజికల్‌ మెజర్మెంట్‌ టెస్టులు ప్రారంభించింది. అవి నిన్నటితో ముగిశాయి. 69 వేల మంది ఈ పరీక్షలకు హాజరుకాగా.. దాదాపు 39 వేల మంది అర్హత సాధించినట్టు పోలీస్‌ రిక్రూట్‌మెంట్‌ బోర్డు చైర్మన్‌ రవి ప్రకాశ్‌ తెలిపారు.

వీరికి మార్చి చివరి వారం లేదా ఏప్రిల్‌ మొదటి వారంలో ఫైనల్‌ రాత పరీక్షలు నిర్వహిస్తామన్నారు. హోంగార్డుల రిజర్వేషన్‌పై హైకోర్టు తీర్పునకు అనుగుణంగా వ్యవహరిస్తామని చెప్పారు. కేసు వ్యవహారానికి సంబంధించి పీఆర్‌బీని కోర్టు అడిగిన వివరాలు త్వరలో అందజేయబోతున్నట్లు తెలిపారు. కాకినాడ జేఎన్‌టీయూకు పరీక్ష నిర్వహణ బాధ్యత అప్పగించామని తెలిపారు. కాగా ఈ పోస్టులకు 2023 ఫిబ్రవరిలో 4.90 లక్షల మంది ప్రాథమిక పరీక్ష రాశారు.