కాంగ్రెస్ లో చేరిన‌ నటుడు రాజా

సినీ నటుడు, పాస్టర్ రాజా కాంగ్రెస్ పార్టీ కండువా కప్పుకున్నారు. ఒకప్పుడు ఆనంద్ సినిమాతో భారీగా పాపులారిటీని సొంతం చేసుకున్న రాజా.. ఆ తర్వాత సినీ కెరీర్ లో గొప్ప స్థాయికి చేరుకోలేకపోయారు. కొన్ని సినిమాలలో కీలక పాత్రల్లో కనిపించాడు. ఆ తర్వాత చిత్ర పరిశ్రమకు కూడా దూరమయ్యారు. ఇక పాస్టర్ గా రాజా కనిపించడం కూడా చాలా మందిని షాక్ కు గురి చేసింది. ఇక పొలిటికల్ గా కూడా తన లక్ ను పరీక్షించుకోవాలని అనుకుంటూ ఉన్నాడు.

ఊహించని విధంగా కాంగ్రెస్ పార్టీలో చేరాడు సినీ నటుడు రాజా. విజయవాడ ఆంధ్రరత్న భవన్ లో బుధవారం పీసీసీ అధ్యక్షులు గిడుగు రుద్రరాజు ఆయనకు సాదర స్వాగతం పలికారు. రాష్ట్ర కాంగ్రెస్ ప్రధాన కార్యాలయంలో రాజాకు కండువా కప్పిన పీసీసీ అధ్యక్షులు రాజాను పార్టీలోకి ఆహ్వానించారు.

రాజా మీడియాతో మాట్లాడుతూ.. కాంగ్రెస్ పార్టీకి తాను ముందు నుంచి అభిమానిని అని చెప్పారు. సినిమాలు, ఆ తరువాత ఆధ్యాత్మిక జీవితంతో కొంతకాలం పార్టీకి దూరమయ్యానని అన్నారు. మణిపూర్ అల్లర్ల సందర్భంగా దేశంలో ఎవ్వరూ కూడా సాహసించని విధంగా రాహుల్ గాంధీ స్పందించిన తీరు తనను ఎంతో ప్రభావితం చేసిందని.. అదే స్పూర్తితో తాను కాంగ్రెస్ పార్టీలో చేరానని తెలిపారు. పార్టీ అధిష్టానం ఆదేశాలకు అనుగుణంగా తనకు ఏ బాధ్యత అప్పగించినా నెరవేరుస్తానని రాజా తెలిపారు. ప్రస్తుతం దేశంలో నెలకొన్న పరిస్థితులను అందరూ చూస్తున్నారని రాజా అన్నారు. అందరికీ న్యాయం చేసే పార్టీ కాంగ్రెస్ ఒక్కటేనని అన్నారు.