Vizag : సెల్ఫీ వీడియో కలకలం.. ఆత్మహత్య చేసుకుంటామంటూ బంధువుల‌కు పంపి
ఆత్మహత్య చేసుకుంటామంటూ దంపతులు సెల్ఫీ వీడియో తీసుకుని క‌నిపించ‌కుండా పోవ‌డం కలకలం రేపుతోంది
By తోట వంశీ కుమార్‌ Published on 28 March 2023 6:45 AM GMT
మీరా, వరప్రసాద్
ఆత్మహత్య చేసుకుంటామంటూ దంపతులు సెల్ఫీ వీడియో తీసుకుని క‌నిపించ‌కుండా పోవ‌డం కలకలం రేపుతోంది. ఈ ఘ‌ట‌న విశాఖ‌ప‌ట్నంలో చోటు చేసుకుంది. వ‌డ్ల‌పూడి తిరుమ‌ల‌న‌గ‌ర్‌లో వరప్రసాద్(47), మీరా(41) దంపతులు నివాసం ఉంటున్నారు. వరప్రసాద్ స్టీల్‌ప్లాంట్ ఉద్యోగి. గ‌తకొద్ది రోజులుగా వీరు ఆర్థిక ఇబ్బందుల‌తో బాధ‌ప‌డుతున్నారు.
ఆర్థిక ఇబ్బందుల కార‌ణంగా ఆత్మహత్య చేసుకుంటున్నామ‌ని, పిల్ల‌ల‌ను బాగా చూసుకోవాల‌ని ఓ వీడియో తీసి బంధువుల‌కు పంపి సెల్‌ఫోన్ స్విచ్ ఆఫ్ చేసుకున్నారు. ఈ వీడియోను చూసిన వారి కుమారుడు కృష్ణ సాయి తేజ్ దువ్వాడ పోలీస్ స్టేష‌న్‌లో ఫిర్యాదు చేశారు. కేసు న‌మోదు చేసిన పోలీసులు వారి కోసం గాలింపు చేప‌ట్టారు.
ఈ క్ర‌మంలో అనకాపల్లి జిల్లాలోని ఏలేరు కాలువ దగ్గర దంపతుల బ్యాగు, దుస్తులు, చెప్పులు లభ్యమయ్యాయి. ప్ర‌స్తుతానికి మిస్సింగ్ కేసు న‌మోదు చేసుకున్న పోలీసులు ద‌ర్యాప్తు చేస్తున్నారు. ఇంత‌కు వాళ్లు ఎక్క‌డికైనా వెళ్లిపోయారా..? ఆత్మహత్య చేసుకున్నారా..? అన్న కోణంలోనూ విచార‌ణ చేస్తున్నారు.
