Video: కదులుతున్న బైక్‌పై వ్యక్తి 'టైటానిక్' పోజు.. చివరికి..

బైక్‌పై ప్రమాదకరమైన విన్యాసాలు చేస్తున్న వీడియో సోషల్ మీడియాలో వైరల్ కావడంతో కాన్పూర్ పోలీసులు శనివారం ఓ వ్యక్తిపై ఎఫ్ఐఆర్ నమోదు చేశారు. వైరల్ వీడియోలో, వ్యక్తి కదులుతున్న బైక్‌పై నిలబడి 'టైటానిక్' భంగిమలో ఉండటానికి ప్రయత్నిస్తున్నట్లు చూడవచ్చు. పోలీసులు తెలిపిన వివరాల ప్రకారం.. ఈ సంఘటన నవాన్‌గంజ్ పోలీస్ స్టేషన్ పరిధిలోని నగరంలోని గంగా బ్యారేజీ ప్రాంతంలో జరిగింది.

వీడియో సోషల్ మీడియాలో వైరల్ కావడంతో, కాన్పూర్ పోలీసులు అతనిపై భారతీయ శిక్షాస్మృతి (ఐపిసి) సంబంధిత సెక్షన్ల కింద కేసు నమోదు చేశారు. బైక్ ఉన్నావ్‌లో రిజిస్టర్ అయినందున మోటారు వాహనాల చట్టంలోని సంబంధిత సెక్షన్ల కింద ఉన్నావ్ పోలీసులు అతనిపై రూ.12,000 జరిమానా కూడా విధించారు.

కాన్పూర్ పోలీస్ అసిస్టెంట్ కమీషనర్ ఆఫ్ పోలీస్ (ACP) మహేష్ కుమార్ మీడియాతో మాట్లాడుతూ.. "ఈరోజు, సోషల్ మీడియాలో బైక్ స్టంట్ వీడియో వైరల్ అయ్యింది. వీడియో నవాబ్ గంజ్ పోలీస్ స్టేషన్ పరిధిలోకి వస్తుంది. వెంటనే వీడియోపై దృష్టి సారించాం. ఐపీసీ సెక్షన్ 336 కింద కేసు నమోదు చేశాం. నంబర్ ప్లేట్ వివరాల ద్వారా బైక్ ఉన్నావ్‌లో రిజిస్టర్ అయినట్లు గుర్తించారు. MV చట్టం కింద చలాన్ జారీ చేయాలని ఉన్నావ్ పోలీసులను కూడా మేము ఆదేశించాము'' అని తెలిపారు.

గతంలో ఇదే తరహాలో ఉత్తరప్రదేశ్‌లోని కాన్పూర్‌లో పోలీసు అధికారుల ఎదుట బైక్‌పై ప్రమాదకరమైన వీలీ స్టంట్‌ చేసినందుకు కాన్పూర్ పోలీసులు జరిమానా విధించారు. అతని చర్యలకు రూ.5,000 జరిమానా విధించారు.