నింగిలోకి దూసుకువెళ్ల‌నున్న ఎస్ఎస్ఎల్వీ-డీ2.. స‌ర్వం సిద్దం
ISRO to launch new rocket SSLV-D2 today.భారత అంతరిక్ష పరిశోధనా సంస్థ (ఇస్రో) మ‌రో ప్ర‌యోగానికి సిద్ద‌మైంది.
By తోట వంశీ కుమార్‌ Published on 10 Feb 2023 2:54 AM GMT
భారత అంతరిక్ష పరిశోధనా సంస్థ (ఇస్రో) మ‌రో ప్ర‌యోగానికి సిద్ద‌మైంది. తిరుప‌తి జిల్లా సూళ్లూరుపేట స‌మీపంలో ఉన్న స‌తీష్ ధవ‌న్ స్పేస్ సెంట‌ర్‌(షార్‌) నుంచి చిన్న ఉపగ్రహ వాహకనౌక ఎస్ఎస్ఎల్వీ-డీ2ను ప్ర‌యోగించ‌నుంది. ఈ రోజు(శుక్ర‌వారం) ఉద‌యం 9.18 గంట‌ల‌కు మొద‌టి ప్ర‌యోగ వేదిక నుంచి ఎస్ఎస్ఎల్వీ-డీ2 నింగిలోకి దూసుకువెళ్ల‌నుంది. ఇప్ప‌టికే కౌంట్ డౌన్ ప్రారంభమైంది. ఈ ప్ర‌యోగం ద్వారా ఇస్రోకు చెందిన 156.3కిలోల బరువు కలిగిన ఈవోఎస్-07 ఉపగ్రహంతో పాటు 11.5 కిలోల బ‌రువున్న యూఎస్ఏ అంటారిస్ సంస్థకు చెందిన జానుస్-1 అలాగే చెన్నై స్పేస్ కిడ్జ్ ఇండియా ఆధ్వర్యంలో విద్యార్థులు రూపొందించిన 8.7 కిలోల ఆజాదీశాట్-2 ను క‌క్ష్య‌లో ప్ర‌వేశ పెట్ట‌నున్నారు.
ఇస్రో చైర్మ‌న్ సోమ‌నాథ‌న్ ప‌ర్య‌వేక్ష‌ణ‌లో ఎంఆర్ఆర్ క‌మిటీ ఛైర్మ‌న్ ఈఎస్ ప‌ద్మ‌కుమార్ ఆధ్వర్యంలో మిష‌న్ రెడీనెస్ రివ్యూ స‌మావేశం గురువారం ఉద‌యం జ‌రిగింది. గ‌తేడాదిలో ఎస్ఎస్ఎల్వీ-డీ1 పేరుతో చేప‌ట్టిన తొలి ప్ర‌యోగం విఫ‌లం కావ‌డంతో ఈ ప్ర‌యోగాన్ని విజ‌య‌వంతం చేసేందుకు ఇస్త్రో శాస్త్ర‌వేత్త‌లు కృషి చేస్తున్నారు.
ఎస్ఎస్ఎల్వీ-డీ2 రాకెట్ మొత్తం పొడ‌వు 34 మీట‌ర్లు కాగా వెడ‌ల్పు రెండు మీట‌ర్లు, బరువు 119 ట‌న్నులు. ఈ ప్ర‌యోగం 15 నిమిషాల్లో పూర్తి కానుంది. 450 కిలో మీటర్ల ఎత్తులో 785 సెకన్ల వ్యవధిలో ఈవోఎస్-07 అదేవిధంగా, 880 సెకన్ల వ్యవధిలో జానుస్-1ను, 900 సెకన్లకు ఆజాదీశాట్ ను కక్ష్యలోకి ప్ర‌వేశ పెట్ట‌డంతో ప్ర‌యోగం పూర్తి కానుంది.
