తెలంగాణ ఎన్నికల బరిలో వైఎస్ విజయమ్మ!

వైయస్సార్ తెలంగాణ పార్టీ ( వైఎస్‌ఆర్‌టిపి )ని కాంగ్రెస్‌లో విలీనమవుతుందనే ఊహాగానాలకు స్వస్తి పలికినట్లైంది. తెలంగాణ ఎన్నికల్లో ఒంటరిగానే పోటీ చేయాలని వైఎస్ఆర్టీపీ అధినేత్రి వైఎస్ షర్మిల డిసైడ్ అయ్యారు. తెలంగాణలో వచ్చే ఎన్నికల్లో 119 స్థానాలకు గానూ 100 స్థానాల్లో పార్టీ ఒంటరిగా పోటీ చేయనుందని ఆ పార్టీ వర్గాలు అంటున్నాయి. తెలంగాణ ఎన్నికల బరిలో తన తల్లి విజయమ్మను నిలపాలని షర్మిల భావిస్తున్నారని సమాచారం. వైఎస్‌ షర్మిల పాలేరు, మిర్యాలగూడ అసెంబ్లీ నియోజకవర్గాల నుంచి పోటీ చేయనుండగా, ఆమె తల్లి వైఎస్ విజయమ్మ సికింద్రాబాద్ అసెంబ్లీ నియోజకవర్గం నుంచి పోటీ చేయనున్నారని సమాచారం.

తన తండ్రి వైఎస్ రాజశేఖర్ రెడ్డి జయంతి సందర్భంగా 2021 జూలై 8న వైఎస్‌ఆర్‌టీపీని స్థాపించిన వైఎస్‌ షర్మిల సెప్టెంబర్ 30వ తేదీలోగా కాంగ్రెస్ పార్టీలో విలీనాన్ని ఖరారు చేసేందుకు గడువు విధించారు. అయితే తెలంగాణలో సీమాంధ్ర వ్యతిరేక శక్తుల నుంచి ఎదురుదెబ్బ తగులుతుందనే భయంతో కాంగ్రెస్ అధిష్ఠానం ఆమెను పార్టీలోకి చేర్చుకోలేదు. అలాగే పాలేరు సీటుపై ఆమె పట్టుబట్టడం బీఆర్‌ఎస్ నుంచి కాంగ్రెస్‌లోకి వలస వచ్చిన తుమ్మల నాగేశ్వరరావును సర్దుబాటు చేయడంలో ఇప్పటికే గందరగోళంలో ఉన్న కాంగ్రెస్ మాంత్రికులను కూడా ఇబ్బంది పెట్టింది.

మరోవైపు పార్టీ ముఖ్య నేతలతో షర్మిల సమావేశం అవుతున్నారు. నియోజకవర్గాల వారీగా అభ్యర్థులను ఖరారు చేస్తున్నట్టు తెలుస్తోంది. సూర్యాపేట నుంచి పిట్ట రాంరెడ్డి, సత్తుపల్లి నుంచి కవిత, బోధన్ నుంచి సత్యవతి, కల్వకుర్తి నుంచి అర్జున్ రెడ్డి, వనపర్తి నుంచి వెంకటేశ్వర రెడ్డి, నర్సంపేట నుంచి శాంతికుమార్, అదిలాబాద్ నుంచి బెజ్జంకి అనిల్, చేవెళ్ల నుంచి దయానంద్, గజ్వేల్ నుంచి రామలింగారెడ్డి, సిద్దిపేటలో నర్సింహారెడ్డి, సిరిసిల్లలో చొక్కాల రాము, కామారెడ్డి నుంచి నీలం రమేశ్, అంబర్ పేట నుంచి గట్టు రామచంద్రరావును ఎన్నికల బరిలో నిలిపేందుకు ఏర్పాట్లు చేస్తోంది. ఇవాళ పార్టీ రాష్ట్ర కార్యవర్గం సమావేశం కానుంది. ఈ సమావేశంలో పార్టీ భవిష్యత్‌ కార్యాచరణ ప్రకటించే అవకాశాలు కనిపిస్తున్నాయి.