కోర్టు ధిక్కార కేసు.. మెదక్ జిల్లా కలెక్టర్‌కు 6 నెలల జైలు శిక్ష

మెదక్ జిల్లా కలెక్టర్ రాహుల్ రాజ్‌కు తెలంగాణ హైకోర్టు జైలు శిక్ష విధించింది. కోర్టు ఉత్తర్వులను ఉద్దేశపూర్వకంగా ధిక్కరించినందుకు ఆయనకు ఈ శిక్ష పడింది. కోర్టు ఆదేశాలను అమలు చేయడంలో నిర్లక్ష్యం వహించినందుకు గాను మెదక్ జిల్లా కలెక్టర్ రాహుల్ రాజ్కు తెలంగాణ హైకోర్టు ఆరు నెలల సాధారణ జైలు శిక్ష, ₹2,000 జరిమానా విధిస్తూ తీర్పునిచ్చింది. భూ వివాదానికి సంబంధించి గతంలో కోర్టు కొన్ని స్పష్టమైన ఆదేశాలను జారీ చేసింది. అయితే, కలెక్టర్ ఆ ఆదేశాలను అమలు చేయలేదని, కావాలనే కోర్టు ఉత్తర్వులను ధిక్కరించారని మెదక్ జిల్లా బోనాల్ గ్రామానికి చెందిన లక్ష్మి అనే మహిళ హైకోర్టును ఆశ్రయించారు.

ఈ ధిక్కార పిటిషన్‌ను విచారించిన న్యాయస్థానం, కలెక్టర్ తీరుపై తీవ్ర అసహనం వ్యక్తం చేసింది. ఉన్నత స్థాయి అధికారి అయి ఉండి, న్యాయస్థాన ఉత్తర్వులను బేఖాతరు చేయడం సహించరానిదని పేర్కొంటూ ఈ కఠిన నిర్ణయం తీసుకుంది. తీర్పు వెలువరించిన వెంటనే శిక్షను అమలు చేయకుండా కోర్టు కొంత సమయం ఇచ్చింది. ఈ తీర్పుపై కలెక్టర్ పైకోర్టులో (అప్పీలేట్ బెంచ్) అప్పీలు చేసుకునేందుకు వీలుగా జైలు శిక్షను నాలుగు వారాల పాటు నిలిపివేస్తూ హైకోర్టు ఉత్తర్వులు ఇచ్చింది. ఒకవేళ ఈ నాలుగు వారాల్లో పైకోర్టు నుండి స్టే రాకపోతే, ఆయన శిక్షను అనుభవించాల్సి ఉంటుంది.