కాళేశ్వరం విచారణలో కీలక మలుపు..పీసీ ఘోష్ కమిషన్ నివేదికపై రేపు హైకోర్టు తీర్పు

కాళేశ్వరం ప్రాజెక్టు నిర్మాణంలో జరిగిన అక్రమాలపై విచారణ చేపట్టిన జస్టిస్ పీసీ ఘోష్ కమిషన్ వ్యవహారంలో రేపు కీలక మలుపు తిరగనుంది. రేవంత్ రెడ్డి ప్రభుత్వం నియమించిన ఈ విచారణ కమిషన్ నివేదికను సవాలు చేస్తూ దాఖలైన పిటిషన్లపై తెలంగాణ హైకోర్టు రేపు తన తుది తీర్పును వెలువరించనుంది.

గత ప్రభుత్వ హయాంలో నిర్మించిన కాళేశ్వరం ప్రాజెక్టులో మేడిగడ్డ బ్యారేజీ కుంగిపోవడం, నిధుల దుర్వినియోగం వంటి అంశాలపై లోతైన విచారణకు కాంగ్రెస్ ప్రభుత్వం ఈ కమిషన్‌ను ఏర్పాటు చేసింది. అయితే, ఈ కమిషన్ విచారణ ప్రక్రియను తప్పుబడుతూ బీఆర్ఎస్ అధినేత కేసీఆర్, మాజీ మంత్రి హరీశ్ రావుతో పాటు ఐఏఎస్ అధికారిణి స్మితా సబర్వాల్, మాజీ సీఎస్ ఎస్.కే. జోషి కోర్టును ఆశ్రయించారు. కమిషన్ తమ వాదనలను సరైన రీతిలో పరిగణనలోకి తీసుకోవడం లేదని, సహజ న్యాయ సూత్రాలకు విరుద్ధంగా విచారణ సాగుతోందని, కాబట్టి ఈ నివేదికను రద్దు చేయాలని వారు తమ పిటిషన్లలో కోరారు.

దీనిపై ఇప్పటికే ప్రభుత్వం మరియు పిటిషనర్ల తరఫున సుదీర్ఘ వాదనలు విన్న హైకోర్టు బెంచ్ తీర్పును రిజర్వు చేసింది. రేపు వెలువడనున్న ఈ తీర్పు రాజకీయంగానూ, పరిపాలనాపరంగానూ అత్యంత ప్రాధాన్యత సంతరించుకుంది. కోర్టు గనుక కమిషన్ నివేదికకు గ్రీన్ సిగ్నల్ ఇస్తే, గత పాలకులపై చట్టపరమైన చర్యలు తీసుకునేందుకు ప్రభుత్వానికి మార్గం సుగమం అవుతుంది. ఒకవేళ తీర్పు ప్రతికూలంగా వస్తే అది ప్రభుత్వ విచారణా ప్రక్రియకు పెద్ద అడ్డంకిగా మారే అవకాశం ఉంది. దీంతో రాష్ట్రవ్యాప్తంగా ఈ తీర్పుపై తీవ్ర ఉత్కంఠ నెలకొంది.