గృహాజ్యోతి పథకం.. వారి కోసం స్పెషల్‌ కౌంటర్లు

తెలంగాణ ప్రభుత్వం ఇటీవల గృహజ్యోతి పథకాన్ని ప్రారంభించింది, ఇది 6 హామీ పథకాలలో ఒకటి. ఈ పథకం కింద ప్రభుత్వం 200 యూనిట్ల ఉచిత విద్యుత్‌ను అందిస్తోంది. ఇప్పటికే చాలా కుటుంబాలు ఈ పథకం నుండి ప్రయోజనాలను పొందడం ప్రారంభించాయి. అయితే కొందరు గృహాజ్యోతి పథకానికి అర్హులు అయి ఉండి, జీరో బిల్లు రాని వారి కోసం ప్రత్యేక కౌంటర్లు ఏర్పాటు చేసిన రాష్ట్ర సర్కార్‌ తెలిపింది. ఎంపీడీవో, మున్సిపల్‌, జీహెచ్‌ఎంసీ సర్కిల్‌ కార్యాలయాల్లో ఈ ప్రత్యేక కౌంటర్లు అందుబాటులో ఉంటాయని పేర్కొంది. ఈ ప్రక్రియ నిరంతరం కొనసాగుతుందని తెలిపింది. అర్హులు అయిన వారు తమ వివరాలను సరి చేసుకోవాలని సూచించింది. ఈ స్కీం కింద 200 యూనిట్ల వరకు ఉచిత కరెంట్‌ అందిస్తున్న విషయం తెలిసిందే.

గృహ జ్యోతి పథకానికి ప్రజాపాలన దరఖాస్తు ద్వారా ప్రజలు దరఖాస్తు చేసుకున్నారు. అర్హత ప్రమాణాల ఆధారంగా లబ్ధిదారులను ఎంపిక చేశారు. సగటున 200 యూనిట్ల కంటే తక్కువ విద్యుత్ వినియోగించే వారికి ప్రాధాన్యత ఇస్తారు. ప్రభుత్వం ఆన్‌లైన్ ప్రక్రియ ద్వారా లబ్ధిదారులను ఎంపిక చేసినప్పటికీ చాలా మంది నిజమైన లబ్ధిదారులకు జీరో కరెంట్ బిల్లు ప్రయోజనం అందలేదు. ఆన్‌లైన్‌లో లబ్ధిదారుల ఎంపిక ప్రక్రియలో తప్పిదాల కారణంగా ఇది జరిగింది. ప్రభుత్వం రూపొందించిన షరతులకు కట్టుబడి అభ్యర్థులను ఎంపిక చేసేందుకు ప్రక్రియ స్వయంచాలకంగా జరిగింది. కానీ చాలా మంది నిజమైన లబ్ధిదారులు ఈ ప్రయోజనాలను కోల్పోయారు.

గృహ జ్యోతి పథకానికి దరఖాస్తు చేసి, ఇంకా జీరో బిల్లు పొందని వ్యక్తులు పథకానికి దరఖాస్తు చేసుకోవడానికి మరొక అవకాశం ఉంటుంది. ఈసారి దరఖాస్తుదారులు బకాయిలు లేకుండా చెల్లించిన ఇటీవలి కరెంట్ బిల్లులు, ప్రజాపాలన దరఖాస్తు నంబర్, ఆధార్ కార్డ్, రేషన్ కార్డులను సమీపంలోని ఎంపీడీఓ కార్యాలయంలో సమర్పించాలి. దరఖాస్తుదారులు మరోసారి పథకానికి దరఖాస్తు చేసుకోవాలని, ఎంపీడీవో వద్ద అధికారులు కోరిన విధంగా అవసరమైన పత్రాలను సమర్పించి, పత్రాలను పూర్తి చేయాలని ప్రభుత్వం తెలిపింది. అర్హత ఉన్నప్పటికీ పథకానికి ఎంపిక కాని వ్యక్తులకు మాత్రమే ఈ అవకాశం.