Jagtial: 'చేతబడి చేసేవారిని చంపేస్తాం'.. కలకలం రేపుతోన్న పోస్టర్‌

చేతబడి చేసేవారిని చంపేస్తామంటూ జగిత్యాల జిల్లా మేడిపల్లి మండలం కట్లకుంట గ్రామంలో వెలసిన పోస్టర్‌ కలకలం రేపింది. ప్రజల మంచి కోరే సంస్థ అనే పేరుతో సోమవారం రాత్రి అతికించిన పోస్టర్ ప్రజలను హెచ్చరించింది. ఈ హెచ్చరిక ప్రజల్లో భయాందోళనకు గురి చేసింది. గ్రామంలోని పునాది రాయిపై ఎర్ర సిరాతో రాసి అతికించిన పోస్టర్‌లో.. ప్రజల నుండి వచ్చిన ఫిర్యాదుల ఆధారంగా, చేతబడి చేసే వారందరినీ ఒక్కొక్కరిగా చంపాలని తమ సంస్థ నిర్ణయించుకుందని, గచ్చునూతి కాలనీకి చెందిన ఇద్దరు వ్యక్తులతో ఇది ప్రారంభించబడుతుందని గుర్తు తెలియని వ్యక్తులు పోస్టర్‌లో పేర్కొన్నారు.

ఆ తర్వాత గుండ్లవాడ కట్టు, గొల్లవాడ కట్టు, గౌండ్లవాడ, పాల కేంద్రం, మాల, మాదిగ వాడ కట్టులో ఉన్న మంత్రగాళ్లందరినీ చంపుతామని పేర్కొన్నారు. ఎవరు, ఎప్పుడు ఎలా చస్తారో తమకే తెలియదన్నారు. గ్రామ ప్రజలు ఇప్పటి వరకు ఎలా ఉన్నారో, అలాగే ఉండాలని, అలా కాకుండా మంత్రగాళ్లకు సపోర్ట్‌ చేస్తే మీకు (గ్రామ ప్రజలకు) కూడా ప్రాణాపాయం ఉండొచ్చని పోస్టర్‌లో ఉంది. ఇప్పటికే అనేక మంది మంత్రగాళ్ల వల్ల ప్రజలు ఇబ్బందులు పడుతున్నారని గుర్తు తెలియని సంస్థ తన పోస్టర్‌లో రాసింది. ఈ విషయం తెలుసుకున్న పోలీసులు గ్రామానికి చేరుకుని పోస్టర్‌ను తొలగించారు.

సర్కిల్ ఇన్‌స్పెక్టర్ బి.సురేష్ బాబు మాట్లాడుతూ.. రెండేళ్ల క్రితం రాయికల్ మండలం జగన్నాథపూర్ గ్రామంలో ఇలాంటి ఘటనే చోటు చేసుకుంది. చేతబడి చేసినందుకు ఎనిమిది మంది గ్రామస్తులను బెదిరించే బ్యానర్‌పై దుండగులు హెచ్చరికను ఉంచారు, కానీ ఎటువంటి అవాంఛనీయ సంఘటనలు జరగలేదు. పోలీసులు తమ కళాబృందంతో పలు అంశాలపై ప్రజలకు అవగాహన కల్పించి చేతబడి, కుంభకోణాలను నమ్మవద్దని కోరారు. ఈ ఘటనపై పోలీసులు కేసు నమోదు చేసి దర్యాప్తు ప్రారంభించినట్లు ఆయన తెలిపారు.