ఖైరతాబాద్ బడా గణేశ్ దర్శనానికి అర్ధరాత్రి వరకే ఛాన్స్..ఎందుకంటే?

హైదరాబాద్ సిటీలో గణేశ్ నవరాత్రోత్సవాలు ఘనంగా కొనసాగుతున్నాయి. అటు ఖైరతాబాద్ బడా గణేశ్‌ను దర్శించుకునేందుకు భక్తులు పెద్ద ఎత్తున తరలివస్తున్నారు. అయితే గణేశ్ నిమజ్జనం సమయం సమీపించడంతో ఇవాళ అర్ధరాత్రి వరకే భక్తులకు దర్శనానికి అనుమతి ఉంటుందని నిర్వాహకులు స్పష్టం చేశారు. ఆ తర్వాత భక్తుల దర్శనాలను నిలిపివేస్తామని పేర్కొన్నారు. అయితే ఖైరతాబాద్ మహా గణపతిని దర్శించుకునేందుకు ఈరోజు చివరి రోజు కావడంతో భక్తుల రద్దీ మరింతగా ఉండే అవకాశం ఉంది.

ఇక, శనివారం ఉదయం ఖైరతాబాద్ మహా గణపతి నిమజ్జనం చేపట్టనున్నారు. ఈ క్రమంలోనే షెడ్డు తొలగింపు పనులు, క్రేన్‌ ఏర్పాటు, ఇతర పనుల నేపథ్యంలో ఖైరతాబాద్ మహా గణపతి దర్శనాలను గురువారం అర్దరాత్రి వరకే అనుమతించనున్నట్టుగా నిర్వహకులు తెలిపారు. భక్తులు ఈ విషయాన్ని గమనించి నిర్వాహకులకు, పోలీసులకు సహకరించాలని కోరారు. ఇక, ఈ ఏడాది ఖైరతాబాద్ మహా గణపతి ఎత్తు 69 అడుగులు కాగా... శ్రీ విశ్వశాంతి మహాశక్తి గణపతిగా పూజలు అందుకుంటున్నారు. మూడు ముఖాలతో, పంచముఖ నాగేంద్రుడి నీడలో నిలబడి ఉన్నట్టుగా మహాగణపతి భక్తులకు దర్శనమిస్తున్నారు.