వాట్సాప్‌లోనూ ప్రజావాణి పిటిషన్లు స్వీకరణ..వారి కోసం మాత్రమే

ప్రజావాణిలో పిటిషన్లు దాఖలు చేసే సీనియర్ సిటిజన్లు, దివ్యాంగులకు ఉపశమనం కలిగించే విధంగా హైదరాబాద్ కలెక్టర్ నూతన విధానానికి శ్రీకారం చుట్టారు. పిటిషన్ల స్వీకరణను సులభతరం చేసేందుకు డిజిటల్ మార్గాన్ని ఎంచుకున్నారు. పౌర సేవలను మరింత అందుబాటులోకి తీసుకురావడానికి, హైదరాబాద్ జిల్లా కలెక్టరేట్ వారపు ప్రజావాణి సమావేశాలకు హాజరు కాలేని సీనియర్ సిటిజన్లు, దివ్యాంగజనుల కోసం ప్రత్యేక వాట్సాప్ సేవను ప్రారంభించింది. వారు ఇప్పుడు రిమోట్‌గా పిటిషన్లను పంపవచ్చు, అవి డిజిటల్‌గా నమోదు చేయబడటమే కాకుండా ప్రత్యేకమైన ID ద్వారా ట్రాక్ చేయబడతాయి.

ప్రతి సోమవారం హైదరాబాద్ కలెక్టరేట్‌లో నిర్వహించే ప్రజావాణి కోసం వారి పిటిషన్లను పంపడానికి వాట్సాప్ సేవలను ప్రారంభించాలని కలెక్టర్ హరిచందన నిర్ణయించారు. వారు 7416687878 ఈ వాట్సాప్ నంబర్‌ను ఉపయోగించుకుని జిల్లా కలెక్టర్ కార్యాలయానికి వెళ్లి తమ పిటిషన్లను సమర్పించాల్సిన అవసరం లేదని తెలిపారు. సిబ్బంది వాటిని డౌన్‌లోడ్ చేసుకుని, ప్రత్యేకంగా నిర్వహించబడే పోర్టల్‌లో నమోదు చేసి, ఒక ఐడి నంబర్‌ను కేటాయిస్తారు. వారి దరఖాస్తు అందిందని పిటిషనర్‌కు తెలియజేస్తారు. సంబంధిత విభాగం నుండి యాక్షన్ టేకెన్ రిపోర్ట్ (ATR) అందిన తర్వాత, సమాచారం వారి మొబైల్ నంబర్లకు పంపబడుతుంది..అని కలెక్టర్ తెలిపారు.