గాంధీ ఆశయాలు భారతదేశానికి తక్షణ అవసరం: కేసీఆర్

హైదరాబాద్: కుల, మతాలకు అతీతంగా అన్ని వర్గాల ప్రజల శ్రేయస్సు తన మతమని భావించిన మహాత్మాగాంధీ ఆశయాలు భారతదేశంలో తక్షణావసరమని తెలంగాణ ముఖ్యమంత్రి కె.చంద్రశేఖరరావు అన్నారు. జనవరి 30న (అమరవీరుల దినోత్సవం) జాతిపిత మహాత్మాగాంధీ వర్ధంతి సందర్భంగా ఆయనను స్మరించుకుంటూ సీఎం కేసీఆర్ ఈ వ్యాఖ్యలు చేశారు. దేశ సమగ్రత, ఐక్యత కోసం ప్రాణత్యాగం చేసిన మహాత్మాగాంధీ దేశ ప్రగతికి ఎల్లవేళలా మార్గదర్శకంగా నిలుస్తారని ముఖ్యమంత్రి అన్నారు.

లక్ష్యసాధనలో ఎదురయ్యే అడ్డంకులను అధిగమించి విజయ తీరాలకు చేరుకోవాలనే స్ఫూర్తిని గాంధీజీ జీవితం నుంచి ప్రతి ఒక్కరూ నేర్చుకోవాలని కేసీఆర్‌ ఉద్బోధించారు. గాంధీజీ ఆశయాలకు అనుగుణంగా ముందుకు సాగుతామని ముఖ్యమంత్రి స్పష్టం చేశారు. భారత రాష్ట్ర సమితి (బిఆర్‌ఎస్) వర్కింగ్ ప్రెసిడెంట్, రాష్ట్ర మంత్రి కేటీ రామారావు కూడా మహాత్ముడికి నివాళులర్పించారు. 75 ఏళ్ల క్రితం ఇదే రోజున స్వతంత్ర భారతదేశంలో తొలిసారిగా తీవ్రవాదం తన నీచమైన ముఖాన్ని గాడ్సేగా చూపించిందని ఆయన ట్వీట్ చేశారు.

''బాపు గారికి మనం అర్పించే ఉత్తమమైన నివాళి శాంతి, మత సామరస్యానికి సంబంధించిన ఆయన ఆశయాలను ఆచరించడం అని మహాత్మా గాంధీ 75వ వర్ధంతి సందర్భంగా మనం గుర్తుచేసుకుందాం'' అని పేర్కొన్నారు.