తెలంగాణ పల్లెల్లో స్థానిక పోరు షురూ..నేటి నుంచే మొదటి విడత నామినేషన్లు

తెలంగాణలో పంచాయతీ ఎన్నికల మొదటి విడత నామినేషన్ల ప్రక్రియ నేడు ప్రారంభంకానుంది. ఈ నెల 25న రాష్ట్ర ఎన్నికల సంఘం షెడ్యూల్‌​తో కూడిన నోటిఫికేషన్ జారీ చేసింది. ఇవాళ రిటర్నింగ్ అధికారులు నోటీస్ జారీ చేసి, నామినేషన్ల ప్రక్రియ ప్రారంభిస్తారు. వార్డులు, పంచాయతీల వారీగా ఓటరు జాబితా నామినేషన్ల దాఖలు కేంద్రంలో ప్రచురిస్తారు. ఉదయం పదిన్నర గంటల నుంచి సాయంత్రం 5 వరకు నామినేషన్లు స్వీకరిస్తారు. సర్పంచ్‌గా పోటీ చేయడానికి ఆ గ్రామంలో, వార్డు సభ్యుడిగా చేసేందుకు ఆ వార్డులో ఓటరై ఉండాలి.

మొదటి విడతలో 189 మండలాల్లోని 4,236 పంచాయతీలు, 37 వేల 450 వార్డుల్లో ఎన్నికలు జరగనున్నాయి. ఈ నెల 29న సాయంత్రం 5 గంటలకు నామినేషన్ల సమయం ముగుస్తుంది. ఈ నెల 30న నామినేషన్లు పరిశీలించి చెల్లుబాటైన నామినేషన్ల వివరాలు ప్రకటిస్తారు. తిరస్కరించిన నామినేషన్లపై డిసెంబరు 1న అప్పీళ్లు స్వీకరించి మరుసటి రోజున పరిష్కరిస్తారు. డిసెంబరు 3వ తేదీన మధ్యాహ్నం 3 గంటల వరకు నామినేషన్ల ఉపసంహరణ గడువు ముగిసిన తర్వాత పోటీలో ఉన్న అభ్యర్థుల వివరాలను ప్రకటిస్తారు.