తెలంగాణలో రాజ్యసభ ఉపఎన్నికకు నోటిఫికేషన్ విడుదల

తెలంగాణ రాష్ట్రంలో మ‌రో ఎన్నిక‌ల న‌గారా మోగింది. రాష్ట్రంలో రాజ‌స‌భ ఉప ఎన్నిక‌కు కేంద్ర ఎన్నిక‌ల సంఘం గురువారం నోటిఫికేష‌న్‌ను విడుద‌ల చేసింది. ఇటీవ‌ల ఎమ్మెల్సీగా ఎన్నికైన బండ ప్ర‌కాశ్‌.. త‌న రాజ్య‌స‌భ స్థానానికి రాజీనామా చేసిన సంగ‌తి తెలిసిందే. దీంతో ఆ రాజ్య‌స‌భ స్థానానికి ఉప ఎన్నిక నోటిఫికేష‌న్‌కు సంబంధించిన షెడ్యూల్ వెలువ‌డింది.

ఈ నెల 12న ఎన్నికల నోటిఫికేషన్ విడుదల కానుంది. అదే రోజు నుండి నామినేషన్లను స్వీకరించనున్నారు. ఈ నెల 19వ తేదీ వరకు నామినేషన్ల స్వీకరణకు చివరి తేదీ. ఈ నెల 20న నామినేషన్ల స్కృూట్నీ నిర్వహించనున్నారు. ఈ నెల 23న నామినేషన్ల ఉపసంహరణకు చివరి తేదీ. ఈ నెల 30న ఉద‌యం 9 గంటల నుండి సాయంత్రం 4 గంటల వరకు పోలింగ్ ను నిర్వహించారు. జూన్ 1న‌ తేదీన ఓట్ల లెక్కింపు చేప‌డ‌తారు.

ఇదిలా ఉంటే.. ఈ స్థానానికి ఉప ఎన్నికల్లో టీఆర్ఎస్ నాయకత్వం ఎవరితో భర్తీ చేస్తుందోననే సర్వత్రా ఆసక్తి నెలకొంది. టీఆర్ఎస్ లో ఆశావాహులు చాలా మంది ఉన్నారు. అయితే ఈ పదవి ఎవరికి దక్కుతుందనే విషయమై ఇంకా స్పష్టత రాలేదు. వచ్చే ఏడాదిలో తెలంగాణ రాష్ట్రంలో అసెంబ్లీ ఎన్నికలు జరగనున్న నేప‌థ్యంలో టీఆర్ఎస్ ఎవ‌రికి అవ‌కాశం ఇస్తుందో చూడాలి.