హెచ్‌ఎంపీవీపై తప్పుడు వార్తలు ప్రచారం చేయొద్దు: ఆరోగ్య శాఖ మంత్రి దామోదర
రాష్ట్రంలో హ్యూమన్‌ మెటాప్‌న్యూమోవైరస్‌ (హెచ్‌ఎంపీవీ) ఇన్‌ఫెక్షన్లు సోకే అవకాశం ఉన్నందున ప్రభుత్వం నిరంతరం నిఘా ఉంచుతోందని ఆరోగ్యశాఖ మంత్రి దామోదర రాజనరసింహ సోమవారం అన్నారు.
By అంజి Published on 7 Jan 2025 7:31 AM IST
హెచ్‌ఎంపీవీపై తప్పుడు వార్తలు ప్రచారం చేయొద్దు: ఆరోగ్య శాఖ మంత్రి దామోదర
హైదరాబాద్‌: రాష్ట్రంలో హ్యూమన్‌ మెటాప్‌న్యూమోవైరస్‌ (హెచ్‌ఎంపీవీ) ఇన్‌ఫెక్షన్లు సోకే అవకాశం ఉన్నందున ప్రభుత్వం నిరంతరం నిఘా ఉంచుతోందని, ఈ అంశంపై ఆందోళన చెందాల్సిన అవసరం లేదని ఆరోగ్యశాఖ మంత్రి దామోదర రాజనరసింహ సోమవారం అన్నారు. HMPVపై ఎవరైనా తప్పుడు లేదా నకిలీ నివేదికల ద్వారా భయాందోళనలను వ్యాప్తి చేస్తే కఠినంగా వ్యవహరిస్తామని, వైరస్‌పై తప్పుడు వార్తలను వ్యాప్తి చేయకుండా ప్రజలను మంత్రి హెచ్చరించారు
రాష్ట్రంలోని ప్రజారోగ్య పర్యవేక్షణ, వ్యాధి నిఘా వ్యవస్థలు.. హెచ్‌ఎంపివి కేసుల పట్ల అప్రమత్తంగా ఉండాలని అన్నారు. ప్రభుత్వ వైద్యులందరినీ అలర్ట్‌ చేశామని, అటువంటి ఇన్‌ఫెక్షన్లు ఏవైనా గుర్తించబడినప్పటికీ, లక్షణాలు తేలికపాటివిగా ఉన్నాయని మంత్రి చెప్పారు. “ప్రభుత్వం ఇతర రాష్ట్రాలు, ప్రపంచంలోని ఇతర ప్రాంతాలలో పరిస్థితిని నిరంతరం సమీక్షిస్తోంది. తెలంగాణ ఈ విషయంలో ఎలాంటి పరిస్థితినైనా ఎదుర్కోవడానికి సర్వసన్నద్ధంగా ఉంది” అని ఆయన అన్నారు.
హెచ్‌ఎంపీవీ వైరస్‌ సోకిన వారు తుమ్మినా, దగ్గినా వెలువడే తుంపర్ల ద్వారా, వారితో సన్నిహితంగా మెలగడం వల్ల ఇతరులకు వ్యాపిస్తుంది. నవజాత శిశువులు, ఐదేళ్లలోపు పిల్లలు, ఆస్తమా, ఊపిరితిత్తుల వ్యాధులు, రోగనిరోధక శక్తి తక్కువ ఉన్నవారిపై ప్రభావం ఎక్కువ. వైరస్‌ శరీరంలోకి ప్రవేశించిన 3 నుంచి 6 రోజుల తర్వాత లక్షణాలు కనిపిస్తాయి.
