ప్రజా సమస్యలు తెలుసుకునేందుకు.. కలెక్టర్లు క్షేత్రస్థాయిలో పర్యటించాలి: సీఎం రేవంత్‌

హైదరాబాద్: ప్రజల సమస్యలను తెలుసుకునేందుకు జిల్లా కలెక్టర్లు క్షేత్రస్థాయిలో పర్యటించాలని తెలంగాణ ముఖ్యమంత్రి ఏ రేవంత్ రెడ్డి మంగళవారం అన్నారు. జిల్లా కలెక్టర్లు, పోలీసు సూపరింటెండెంట్లు, ఇతర అధికారుల సదస్సులో ఆయన మాట్లాడుతూ.. అధికారులు మానవతా దృక్పథంతో నిర్ణయాలు తీసుకోవాలని, ఏసీ గదులకే పరిమితమైతే ఉద్యోగంలో సంతృప్తి ఉండదన్నారు.

కలెక్టర్లు తమ విధులను నిర్వర్తించడంలో అభివృద్ధి, సంక్షేమాన్ని సమతుల్యం చేసుకోవాల్సిన అవసరం ఉందని అధికారిక ప్రకటనలో ఆయన పేర్కొన్నారు. అధికారులు వివిధ రాష్ట్రాలకు చెందిన వారని, వారు తెలంగాణ సంస్కృతిలో భాగమైతే ప్రజలకు మెరుగైన సేవలందించవచ్చని అన్నారు.

“ప్రభుత్వానికి కళ్లు, చెవులు మీరే. ప్రతి అధికారి ఒక శంకరన్, ఒక శ్రీధరన్ లా సామాన్య ప్రజలకు ఎప్పుడూ గుర్తుండేలా పనిచేయాలి” అని కలెక్టర్లకు సూచించారు. ప్రభుత్వ ఆశయాలకు అనుగుణంగా మానవీయ కోణంలో ప్రజలకు సేవలు అందించాలని చెప్పారు. అధికారులు తీసుకునే ప్రతి చర్యా ఇది ప్రజా ప్రభుత్వం అని ప్రజలకు తెలిసేలా ఉండాలన్నారు. సంక్షేమం, అభివృద్ధిని సమతూకం చేసుకుంటూ ముందుకు వెళ్లాల్సిన అవసరం ఉందని నొక్కి చెప్పారు. ప్రజా సమస్యలను అర్థం చేసుకుని పరిష్కరించడంలో కలెక్టర్లు విధిగా క్షేత్రస్థాయిలో పర్యటించాలని ఆదేశించారు.

ప్రతి పేద విద్యార్థికి ప్రభుత్వం నెలకు రూ.85 వేలు ఖర్చు చేస్తోందని పేర్కొన్న రేవంత్ రెడ్డి, విద్యావ్యవస్థకు ఎలాంటి నష్టం వాటిల్లకుండా కలెక్టర్లు చూడాలని సూచించారు. ప్రభుత్వ పాఠశాలలు, ఆసుపత్రులను కలెక్టర్లు పర్యవేక్షించాలి. అధికార కాంగ్రెస్‌కు చెందిన ఆరు ఎన్నికల హామీలను పారదర్శకంగా అమలు చేసేలా చూడాలని ఆయన అన్నారు.

ఆక్రమణలకు గురికాకుండా ప్రభుత్వ భూములను కాపాడేందుకు జియో ట్యాగింగ్‌ చేపట్టాలని సూచించారు. రాష్ట్రంలోని అందరికీ ఆరోగ్యశ్రీ ఆరోగ్య బీమా పథకం అందేలా చర్యలు తీసుకోవాలని ముఖ్యమంత్రి సూచించారు. రాష్ట్రంలోని ప్రతి పౌరుడి కోసం 'డిజిటల్ హెల్త్ ప్రొఫైల్' తయారు చేయాలని ఆయన అన్నారు. గ్రామీణ ప్రాంతాల్లో పనిచేసే వైద్యులకు ప్రోత్సాహం అందేలా చర్యలు తీసుకోవాలని రేవంత్ రెడ్డి అన్నారు. గిరిజన ప్రాంతాల్లో సరైన వైద్యం అందేలా కలెక్టర్లు చర్యలు తీసుకోవాలి.