Telangana: మూడు కార్పొరేషన్లకు ఛైర్మన్ల నియామకం

హైదరాబాద్‌: అసెంబ్లీ ఎన్నికలకు సమయం దగ్గర పడుతుండటంతో సీఎం కేసీఆర్‌ ప్రభుత్వం కార్పొరేషన్ల పదవుల భర్తీపై దృష్టిపెట్టింది. ఆయా సామాజిక వర్గాలను దగ్గర చేసుకునే ప్రయత్నంలో భాగంగా కార్పొరేషన్ల పదవులకు నియామకం చేపట్టింది. తాజాగా రాష్ట్రంలో మూడు కార్పొరేషన్లకు సీఎం కేసీఆర్‌ ఛైర్మన్లను నియమించారు. తెలంగాణ రాష్ట్ర ఆర్థిక సంఘం చైర్మన్‌గా మాజీ ఎమ్మెల్సీ వీ భూపాల్‌రెడ్డిని ముఖ్యమంత్రి కే చంద్రశేఖర్‌రావు నియమించారు. దీనికి డైరెక్టర్లుగా గోసుల శ్రీనివాస్ యాదవ్ (హైదరాబాద్), మహ్మద్ సలీం (నారాయణపేట జిల్లా మద్దూరు మండలం రేనెవట్ల గ్రామం) నియమితులయ్యారు.

అలాగే తెలంగాణ స్టేట్ ట్రేడ్ ప్రమోషన్ కార్పొరేషన్ చైర్మన్‌గా సంగారెడ్డి జిల్లా వట్‌పల్లి మండలం మర్వెల్లి గ్రామానికి చెందిన మటం బిక్షపతి నియమితులయ్యారు. తెలంగాణ రాష్ట్ర పారిశ్రామిక అభివృద్ధి సంస్థ చైర్మన్‌గా సంగారెడ్డి జిల్లా జహీరాబాద్‌కు చెందిన మహ్మద్ తన్వీర్ నియమితులయ్యారు. ఈ మేరకు ప్రభుత్వం ఉత్తర్వులు జారీ చేసింది. కార్పొరేషన్‌ పదవులకు ఎంపికైన వీరు.. రెండేళ్ల పాటు పదవిలో కొనసాగనున్నారు.