తెలంగాణలో పత్తి రైతులకు తీపికబురు..కొనుగోళ్ల గడువు పొడిగింపు

తెలంగాణ పత్తి రైతులకు కేంద్ర ప్రభుత్వం తీపి కబురు అందించింది. పత్తి కొనుగోళ్ల గడువును ఈ నెలాఖరు వరకు (ఫిబ్రవరి 28) పొడిగిస్తూ భారత పత్తి సంస్థ (CCI) నిర్ణయం తీసుకుంది. తెలంగాణలో ఈ ఏడాది పత్తి దిగుబడి ఆశించిన స్థాయిలో ఉన్నప్పటికీ, వివిధ కారణాల వల్ల చాలా మంది రైతులు తమ పంటను ఇంకా విక్రయించలేకపోయారు.

గతంలో నిర్ణయించిన గడువు ముగియనుండటంతో రైతులు ఆందోళన చెందారు. ఈ నేపథ్యంలో రాష్ట్ర వ్యవసాయ శాఖ మంత్రి తుమ్మల నాగేశ్వరరావు, కేంద్ర మంత్రి కిషన్ రెడ్డిని కలిసి గడువు పొడిగించాలని కోరారు. రాష్ట్ర ప్రభుత్వం కేంద్ర జౌళిశాఖకు కూడా అధికారికంగా లేఖ రాసింది. ఈ విన్నపాన్ని సానుకూలంగా పరిగణించిన కేంద్రం, సీసీఐ కొనుగోలు కేంద్రాలను నెలాఖరు వరకు కొనసాగించాలని ఆదేశించింది. దీనివల్ల రాష్ట్రంలోని వేలాది మంది రైతులకు కనీస మద్దతు ధర (MSP) లభించే అవకాశం ఉంటుంది.