తెలంగాణలో అమెజాన్‌ 60,000 కోట్ల రూపాయల పెట్టుబడి

దావోస్‌లో జరిగిన వరల్డ్ ఎకనమిక్ ఫోరం వేదికగా పెట్టుబడుల సమీకరణలో ముఖ్యమంత్రి రేవంత్‌ రెడ్డి నేతృత్వంలోని ప్రతినిధి బృందం సరికొత్త రికార్డును నెలకొల్పింది. తాజాగా ప్రపంచ దిగ్గజ సంస్థ అమెజాన్‌.. తెలంగాణలో 60,000 కోట్ల రూపాయల పెట్టుబడి పెట్టేందుకు అంగీకరించింది. ముఖ్యమంత్రి, ఐటీ, పరిశ్రమల శాఖ మంత్రి శ్రీధర్‌ బాబు, అమెజాన్ వెబ్ సర్వీసెస్ గ్లోబల్ పబ్లిక్ పాలసీ వైస్ ప్రెసిడెంట్ శ్రీ మైఖేల్ పుంకేతో చర్చల అనంతరం ఆ మేరకు ఒప్పంద పత్రాలపై సంతకాలు జరిగాయి.

రాష్ట్రంలో ఇప్పటికే మూడు సెంటర్లను అభివృద్ధి చేసిన అమెజాన్, తాజాగా రూ.60 వేల కోట్లతో హైదరాబాద్‌లో డేటా సెంటర్లను విస్తరించనుంది. 2030 నాటికి క్లౌడ్ సర్వీసెస్‌లో మౌలిక సదుపాయాల అభివృద్ధి చేయడానికి 4.4 బిలియన్ డాలర్ల మేరకు పెట్టుబడులు పెట్టనున్నట్టు అమెజాన్ ప్రకటించింది. తెలంగాణలో తన క్లౌడ్ సేవలను విస్తరణకు అమెజాన్ వెబ్ సర్వీసెస్ 2030 నాటికి 4.4 బిలియన్ డాలర్ల పెట్టుబడులను ఇప్పటికే ప్రకటించింది.

ఒక బిలియన్ పెట్టుబడులతో రాష్ట్రంలో గతంలో ప్రారంభించిన మూడు సెంటర్లు ఇప్పటికే పనిచేస్తున్నాయి. కొత్తగా చేపట్టే విస్తరణ ప్రణాళికలకు అవసరమైన భూమిని కేటాయించాలన్న ఏడబ్ల్యూఎస్‌ అభ్యర్థనకు రాష్ట్ర ప్రభుత్వం అంగీకరించింది. అమెజాన్ వంటి ప్రపంచ దిగ్గజ కంపెనీలు తెలంగాణలో గతంలో ఎన్నడూ లేని విధంగా భారీ పెట్టుబడులకు ముందుకు రావటం ఆనందంగా ఉందని ఈ సందర్భంగా ముఖ్యమంత్రి వ్యాఖ్యానించారు. తెలంగాణ రైజింగ్ విజన్‌తో ప్రజా ప్రభుత్వం ఏడాదిగా చేపట్టిన ప్రయత్నాలు ఫలించాయని అన్నారు. ఈ ఒప్పందంతో హైదరాబాద్ దేశంలో డేటా సెంటర్ల హబ్‌గా గుర్తింపు సాధిస్తుందని మంత్రి శ్రీధర్ బాబు అన్నారు.